BAKI,AzerVoice
İranın xarici işlər naziri Abbas Əraqçi bəyan edib ki, İranın nüvə proqramı ilə bağlı böhranın yeganə həlli yolu danışıqlara əsaslanan diplomatik prosesdir. O, xəbərdarlıq edib ki, hərbi təhdidlər heç bir nəticə verməyib və heç bir böhranı həll etməyib.
AzerVoice xəbər verir ki,Əraqçinin bu açıqlamaları Tehranda xarici ölkə səfirləri ilə görüşdən sonra səslənib. Nazir, BMT Təhlükəsizlik Şurasının “Snapback” mexanizmi vasitəsilə İrana qarşı sanksiyaların bərpası qərarının nəticələrini izah edərək bildirib ki, son hadisələr diplomatik oyunun qaydalarını dəyişib və danışıqların bərpasını daha da mürəkkəbləşdirib.
“Biz izahat verdik ki, hər kəs Qərb dövlətlərinin BMT Təhlükəsizlik Şurasında atdığı addımlar və bunun yarada biləcəyi hüquqi və siyasi risklər barədə məlumatlı olsun,” - deyə Əraqçi jurnalistlərə bildirib.
BMT, Avropa dövlətlərinin təşəbbüsü ilə İranın nüvə proqramına görə silah embarqosunu və digər sanksiyaları bərpa edib. London, Paris və Berlin 2015-ci il nüvə sazişinin şərtlərinin pozulduğunu əsas gətirərək, “Snapback” mexanizmini işə salıblar. Tehran isə nüvə silahı hazırlamaq niyyətində olmadığını bildirir.
“İran həmişə ədalətli və balanslı danışıqlarla problemin diplomatik həlli üçün çalışıb, lakin Qərb dövlətləri əsassız və qeyri-real tələbləri ilə bu prosesi pozublar. Təcrübə göstərdi ki, İranın nüvə məsələsinə yalnız danışıqlar yolu ilə diplomatik həll tapmaq mümkündür.”- deyə,Əraqçi vurğulayıb.
Nazir xatırladıb ki, ABŞ-İsrail müharibəsi zamanı ABŞ qüvvələri İranın uran zənginləşdirmə obyektlərinə hücum edib və bu, vəziyyəti daha da gərginləşdirib.
Onun sğzlərinə görə, son illərdə hərbi hücumla bağlı təhdidlər təkrarlanıb, lakin bu metod heç bir problemi həll etməyib.
Nazir hesab edir ki,Qərb dövlətlərinin ‘Snapback’ mexanizmini işə salmaqla göstərdiyi təzyiqlər də eyni dərəcədə səmərəsiz olub. Bu addımlar danışıqları sadəcə daha çətin və mürəkkəb hala gətirdi.
İranlı diplomat qeyd edib ki, Avropa üçlüyü (Böyük Britaniya, Fransa, Almaniya) “Snapback” mexanizmini bir təzyiq vasitəsi kimi istifadə etməklə nəticə əldə edə biləcəyini düşünürdü, amma bu vasitə əksinə, diplomatik səyləri çətinləşdirdi.
O əlavə edib ki, diplomatiya davam edəcək, lakin “danışıqların formatı və iştirakçıları dəyişib”. Əraqçinin sözlərinə görə, Avropa ölkələrinin rolu azalıb və onların danışıqlardakı əsaslandırmaları zəifləyib.
ABŞ-ın ŞƏRTLƏRİ Nələrdir?
The Washington Post qəzetinin məlumatına görə, Vaşinqtonun məqsədi Tehrana dörd əsas şərti qəbul etdirməkdir:
Məzmunlu və birbaşa danışıqlar aparmaq;
Uran zənginləşdirmə proqramını dayandırmaq;
Raket proqramını məhdudlaşdırmaq;
Regional silahlı qruplara maliyyə dəstəyini kəsmək.
Mənbə yazır ki, bu şərtlər əvvəlki danışıqlar raundunda da əsas maneələrdən biri olub və Tehran onları “qeyri-ciddi” hesab edir.