BAKI,VOA,Yusif Şərifzadə

Oman nümayəndə heyəti Hörmüz boğazında gəmi hərəkətinin idarə olunması mexanizmlərinin yaradılmasını müzakirə etmək məqsədilə Tehrana gəlib. Məsələ İran və Oman arasında strateji dəniz marşrutunda koordinasiyanın mümkün formatı ilə bağlı müzakirələrin davam etdiyi bir dövrdə gündəmə gəlib.

VOA xəbər verir ki, İranın rəsmi IRNA agentliyinin məlumatına görə, tərəflər Hörmüz boğazında gəmiçiliyin idarə olunması üçün "müvafiq mexanizmlərin yaradılması" üzrə çərçivə sənədini müzakirə edirlər.

İran müharibə dövrü ərzində dəfələrlə bəyan edib ki, Hörmüz boğazının idarə olunmasının Omanla koordinasiya şəklində həyata keçirilməsinə açıqdır. Oman bu strateji boğazın sahilində yerləşən yeganə digər dövlətdir.

Məlumata görə, müzakirələr əsasən gəmi hərəkətinin təhlükəsiz təşkili və boğazın idarə olunması mexanizmlərinə həsr olunub.

Bununla yanaşı, ABŞ və Körfəz ölkələri Hörmüz boğazının yalnız İran və Oman tərəfindən idarə olunmasını nəzərdə tutan belə bir mexanizmi qəbul etmədiklərini bildiriblər.

Hörmüz boğazı dünya enerji ticarətinin əsas marşrutlarından biri hesab olunur və burada baş verən hər hansı dəyişiklik qlobal neft və mayeləşdirilmiş təbii qaz bazarlarına təsir göstərə bilər.