BAKI,VOA,Yusif Şərifzadə

Yəməndə uzun illərdir nisbətən səngimiş silahlı qarşıdurmanın yenidən genişmiqyaslı müharibəyə çevrilməsi riski artır. Yəmən rəsmiləri, Qərb diplomatları və analitiklərin fikrincə, İranla bağlı regional gərginliyin fonunda husilərin Səudiyyə Ərəbistanına və dəniz nəqliyyatına qarşı hücumları vəziyyəti daha da mürəkkəbləşdirir.

VOA xəbər verir ki, son günlər husilər və beynəlxalq səviyyədə tanınan Yəmən hökumətinə bağlı qüvvələr Qırmızı dəniz sahillərindən başlayaraq Səudiyyə Ərəbistanı sərhədinədək uzanan cəbhə xətti boyunca əlavə qüvvələr cəmləşdiriblər. Məlumat Yəmən hərbi rəsmiləri və analitiklərə istinadən yayılıb.

BMT və Oman vasitəçiliyi ilə aparılan danışıqlar, eləcə də son dövrlərdə Pakistanın da qoşulduğu diplomatik səylər davam etsə də, Qərb diplomatlarının sözlərinə görə, siyasi həllə nail olunacağına dair nikbinlik getdikcə azalır.

Səudiyyə Ərəbistanı 2022-ci ildə husilərlə əldə olunan atəşkəsdən sonra Yəməndə yeni müharibədən yayınmağa çalışıb. Həmin atəşkəs on ildən artıq davam edən və yüz minlərlə insanın döyüşlər və aclıq nəticəsində həyatını itirdiyi münaqişənin intensivliyini əhəmiyyətli dərəcədə azaltmışdı.

Lakin mənbələrin bildirdiyinə görə, husilərin ötən həftə Səudiyyə Ərəbistanındakı hava limanını hədəfə alması, həmçinin krallığa qarşı dəniz blokadası elan etməsi vəziyyəti dəyişdirə bilər. Husilər iki Səudiyyə tankerinə hücum etdiklərini də açıqlayıblar və bunu blokadanın icrası kimi qiymətləndiriblər.

Analitiklər hesab edirlər ki, mövcud hərbi fəallıq və diplomatik səylərin nəticəsiz qalması Yəməndə genişmiqyaslı döyüşlərin yenidən başlaması riskini artırır və bu, regionun təhlükəsizliyinə ciddi təsir göstərə bilər.