BAKI,VOA,Yusif Şərifzadə

ABŞ və İran arasında yenidən artan qarşıdurma və gəmilərə qarşı hücumlarla bağlı təhlükəsizlik narahatlıqları Hörmüz boğazında gəmiçilik fəaliyyətinin azalmasına səbəb olub. Boğazdan keçən neft və qaz tankerlərinin sayı son iki ayın ən aşağı səviyyəsinə enib.

VOA xəbər verir ki, gəmiçilik sənayesində fəaliyyət göstərən mənbələrin məlumatına görə, son 24 saat ərzində Hörmüz boğazından keçən tankerlərin sayı kəskin azalıb.

Məlumata əsasən, bir sıra gəmilər ictimai izləmə sistemlərini söndürməyə başlayıb. Bu səbəbdən hazırda boğazda hərəkət edən gəmilərin dəqiq sayını müəyyənləşdirmək çətinləşib.

Gəmi hərəkətlərini təhlil edən Kpler şirkətinin məlumatına görə, neft və qaz tankerlərinin keçidi mayın 25-dən bu yana ən aşağı göstəriciyə düşüb.

Gəmiçilik üzrə Gibson şirkəti yaydığı hesabatda bildirib ki, Hörmüz boğazında yeni gərginlik uzunmüddətli bağlanmaya səbəb olarsa, qlobal enerji bazarı daha mürəkkəb vəziyyətlə üzləşə bilər.

Hesabatda qeyd olunub ki, son aylarda dünya üzrə enerji ehtiyatlarının azalması fonunda Hörmüz boğazında hər hansı uzunmüddətli məhdudiyyət təchizatın azalmasına, qiymətlərin yüksəlməsinə və tanker bazarında ciddi risklərin yaranmasına səbəb ola bilər.

LSEG və MarineTraffic gəmi izləmə məlumatlarına əsasən, “Sea Faith” neft məhsulları tankerinin İran tərəfinə yaxın boğaz girişinə doğru hərəkət edən azsaylı görünən gəmilərdən biri olduğu bildirilib.

Hörmüz boğazı dünya enerji daşımaları üçün əsas marşrutlardan biri hesab olunur və burada yaranan hər hansı böhran qlobal neft və qaz bazarlarına birbaşa təsir göstərə bilər.