BAKI,VOA,Yusif Şərifzadə
ABŞ ilə İran arasında davam edən sülh səyləri dünya neft bazarında qiymətlərin sabitləşməsinə təsir göstərib. Ticarət iştirakçıları danışıqların müsbət nəticə verəcəyinə ümid etdikləri üçün bazarda ciddi qiymət dəyişiklikləri qeydə alınmayıb.
VOA xəbər verir ki, dünya bazarında etalon hesab olunan Brent markalı neftin qiyməti həftə ərzində 0,3 faiz azalıb.
Cümə günü isə Brent markalı neftin sentyabr müqavilələri Qrinviç vaxtı ilə saat 11:32-yə olan məlumata əsasən, 1 barel üçün 4 sent və ya 0,06 faiz ucuzlaşaraq 71,76 ABŞ dollarına düşüb.
Məlumata görə, bu həftə neft qiymətləri ABŞ və İsrailin İrana qarşı müharibəsinin başlanmasından bəri müşahidə olunmayan səviyyəyə enib.
Bazar iştirakçıları ABŞ ilə İran arasında daimi sülh razılaşmasının əldə olunacağına dair ümidlərin güclənməsinin qiymətlərə təsir etdiyini bildirirlər.