BAKI,VOA
Özbəkistan-Azərbaycan IV Regionlararası Forumu Daşkənddə işini başa çatdırıb,
VOA xəbər verir ki, bu barədə Trend-in xüsusi müxbiri xəbər verir.
Forum “InterContinental Tashkent” hotelində keçirilib və iki ölkə arasında regionlararası əməkdaşlığın inkişafına həsr olunub.
Plenar iclas çərçivəsində Özbəkistanın investisiyalar, sənaye və ticarət naziri Laziz Kudratov, Azərbaycanın iqtisadiyyat naziri Mikayıl Cabbarov, iki ölkənin investisiya və ixrac agentliklərinin nümayəndələri, həmçinin Özbəkistan və Azərbaycan regionlarının nümayəndələri çıxış ediblər.
Forum çərçivəsində ikitərəfli sənədlərin imzalanması və mübadiləsi mərasimi də keçirilib. Bundan əlavə, forum çərçivəsində B2B və G2B formatlarında ikitərəfli görüşlər keçirilib.
Tədbirdə çıxış edən Azərbaycanın iqtisadiyyat naziri Mikayıl Cabbarov Azərbaycanın və Cənubi Qafqazın ən böyük bankı ABB-nin tərəfdaşlıq və "Davr Bank"da pay əldə etmə yolu ilə Özbəkistan bazarına çıxacağını açıqlayıb.
Onun sözlərinə görə, hazırda Özbəkistanda Azərbaycanın demək olar ki, bütün iri vergi ödəyicisi müəssisələri artıq təmsil olunur.
“Bu gün Azərbaycanın və bütün Cənubi Qafqaz regionunun ən böyük bankı – ABB ilə müqavilə imzalanacaq ki, bu da bankın tərəfdaşlıq və "Davr Bank"da pay əldə etmə yolu ilə Özbəkistan bazarına çıxmasını göstərir”, – deyə Cabbarov bildirib.
Nazir Özbəkistan Prezidenti Şavkat Mirziyoyevə, tənzimləyici orqana, Mərkəzi Banka və ölkə hökumətinə rahat investisiya mühitinin yaradılmasına və layihənin həyata keçirilməsinə göstərilən dəstəyə görə minnətdarlığını bildirib.
“Fürsətdən istifadə edərək, hörmətli Şavkat Mirziyoyevə, tənzimləyici orqana, Mərkəzi Banka və hökumətə ümumilikdə rahat investisiya mühitinin yaradılmasına və birbaşa bu layihənin həyata keçirilməsinə göstərilən dəstəyə görə minnətdarlığımı bildirmək istərdim”, – deyə Cabbarov qeyd edib.
O həmçinin vurğulayıb ki, Azərbaycanın Dövlət Neft Şirkəti (SOCAR) Özbəkistanın pərakəndə bazarına çıxmağı, daha sonra investisiyalar yatırmağı və yanacaqdoldurma məntəqələri şəbəkəsi qurmağı planlaşdırır.
Cabbarov Azərbaycanın digər iri dövlət şirkəti – AzerGold-un Özbəkistandakı layihələrdə iştirakını da qeyd edib. “Həmkarım artıq AzerGold haqqında, Özbəkistan şirkətləri ilə tərəfdaşlıq çərçivəsində həm geoloji kəşfiyyat işləri aparacaq, həm də hasilatla məşğul olacaq digər iri dövlət şirkəti haqqında danışdı”, – deyə nazir bildirib.
Öz növbəsində, Özbəkistanın investisiyalar, sənaye və ticarət naziri Laziz Kudratov bildirib ki, özbək mütəxəssisləri Azərbaycanın Füzuli rayonunda “Dostluq” intensiv meyvə bağının yaradılmasına başlayırlar.
“Öz növbəsində, Azərbaycan ərazisində özbək mütəxəssisləri Füzuli rayonunda “Dostluq” intensiv meyvə bağının yaradılmasına başlayırlar”, – deyə Kudratov bildirib.
Onun sözlərinə görə, regionlar arasında birbaşa qarşılıqlı fəaliyyətin inkişafı aqrosənaye və ərzaq sahələrində birgə layihələrin həyata keçirilməsi üçün imkanlar yaradır. Kudratov qeyd edib ki, Sırdərya vilayəti ilə Füzuli, həmçinin Qaşqadərya vilayəti ilə Beyləqan bağçılıq, kənd təsərrüfatı məhsullarının dərin emalı və hazır ərzaq məhsullarının istehsalına diqqət yetirə bilərlər.
O, həmçinin vurğulayıb ki, ümumi dəyəri təxminən 500 milyon dollar olan 7 investisiya layihəsi Azərbaycan-Özbəkistan İnvestisiya Şirkətinin baxışındadır. Kudratov qeyd edib ki, Azərbaycan-Özbəkistan İnvestisiya Şirkəti kapitala birbaşa investisiya yatırmaq, qısamüddətli səhmdar kreditləri vermək, həmçinin layihə sənədlərinin hazırlanması xərclərini kompensasiya etmək yolu ilə biznesə dəstək göstərir.
“Buna görə də bütün biznes nümayəndələrini Azərbaycan-Özbəkistan İnvestisiya Şirkəti ilə daha fəal əməkdaşlıq etməyə çağırıram”, – deyə Kudratov bildirib.