BAKI,VOA, Nailə Babazadə

ABŞ-ın Hörmüz boğazında İran limanlarına giriş-çıxış edən gəmilərə qarşı tətbiq etdiyi dəniz blokadasının ilk 24 saatı ərzində boğazdan dörd gəminin keçid etdiyi qeydə alınıb.

VOA xəbər verir ki,"MarineTraffic" gəmi izləmə sistemindən əldə edilən məlumatlara görə, Liberiya bayrağı altında üzən "Christianna" yük gəmisi dünən axşam saatlarında boğazı keçərək İranın İmam Xomeyni limanında yükünü boşaldıb və hazırda Oman körfəzi sularındadır.

Blokada qərarından sonra hərəkət edən digər gəmilər arasında ABŞ-ın sanksiya siyahısında yer alan "Rich Starry" və "Murlikishan" tankerləri də var.

Çin şirkətinə məxsus "Rich Starry" hazırda Oman körfəzində manevr edərkən, Kuk adaları bayraqlı "Murlikishan" tankerinin mazut yükləmək üçün İraqa doğru irəlilədiyi təxmin edilir. Panama bayraqlı "Peace Gulf" tankeri isə boğazdan keçərək Birləşmiş Ərəb Əmirliklərinin Həmriyyə limanına doğru yoluna davam edir. Beləliklə, blokadanın ilk günündə ikisi sanksiyalı olmaqla cəmi dörd gəmi Hörmüz boğazından keçə bilib.