BAKI,VOA, Nailə Babazadə

ABŞ Prezidenti Donald Tramp, İranla əldə olunan və İsraili də əhatə edən iki həftəlik müvəqqəti atəşkəsdən sonra bölgənin gələcəyi ilə bağlı mühüm açıqlamalar verib.

VOA xəbər verir ki, Tramp strateji əhəmiyyətli Hörmüz boğazının təhlükəsizliyini təmin etmək üçün İranla "ortaq bir girişim" (joint venture) modelini dəyərləndirdiyini bildirib.

İranın Hörmüz boğazından keçən gəmilərdən keçid haqqı alıb-almayacağı ilə bağlı suala cavab verən Tramp, bu məsələyə müsbət yanaşdığını sezdirib: "Bunu ortaq bir layihə kimi reallaşdırmağı düşünürük. Bu, boğazın təhlükəsizliyini təmin etməyin və onu kənar təhdidlərdən qorumağın bir yolu olacaq. Bu, hər kəs üçün gözəl bir həll ola bilər."

Atəşkəsə baxmayaraq, Tramp İranın nüvə ambisiyaları ilə bağlı qəti mövqe nümayiş etdirib. O, "İranda uranın zənginləşdirilməsi olmayacaq" deyərək, bu məsələnin müzakirə mövzusu olmadığını vurğulayıb. Eyni zamanda, ABŞ hərbçilərinin regionu tərk etməyəcəyini qeyd edən Prezident, sülh danışıqlarının aprelin 10-da başlamasını gözlədiyini və Çinin də bu prosesdə müəyyən rol oynadığını bildirib.

Xatırladaq ki, fevralın 28-dən bəri davam edən və qarşılıqlı raket zərbələri ilə genişmiqyaslı müharibəyə çevrilən gərginlikdən sonra Tramp 8 aprel saat 01:30 radələrində atəşkəsi qəbul etdiyini elan edib. Atəşkəsin əsas şərti Hörmüz boğazının dərhal naviqasiya üçün açılması olub. Türkiyə, Pakistan və Misirin vasitəçiliyi ilə əldə olunan bu razılaşma üzrə yekun danışıqların yaxın 15 gün ərzində İslamabadda başa çatdırılması hədəflənir. Lakin İsrail rəhbərliyi atəşkəsi dəstəkləsə də, Livanın bu sazişə daxil olmadığını iddia edərək şimal qonşusuna hücumlarını davam etdirir.