BAKI, VOA, Nailə Babazadə

ABŞ ordusu Prezident Donald Trampın tapşırığı ilə İranın nüvə obyektlərindəki yüksək dərəcədə zənginləşdirilmiş uranyumun ələ keçirilməsinə dair genişmiqyaslı əməliyyat planı hazırlayıb.

VOA xəbər verir ki, ötən həftə Ağ Evə təqdim olunan bu gizli plan, İranda mövcud olan təxminən 450 kiloqram yüksək dərəcəli uranyumun müsadirə edilməsini nəzərdə tutur. Planda radioaktiv materialların təhlükəsiz daşınması üçün bölgəyə ağır qazıntı avadanlıqlarının göndərilməsi və kargo təyyarələri üçün xüsusi uçuş-eniş zolaqlarının inşası öz əksini tapıb.

ABŞ mediasına danışan hərbi ekspertlər bu cür əməliyyatın texniki cəhətdən həddindən artıq mürəkkəb olduğunu və radioaktiv maddələrin çıxarılması üçün bölgəyə havadan minlərlə əsgərin, həmçinin ağır texnikanın yerləşdirilməsinin vacibliyini vurğulayıblar. Mütəxəssislərin fikrincə, belə bir əməliyyat həftələrlə davam edə bilər və yüksək risk dərəcəsinə malikdir. Qeyd olunur ki, ötən il başlanan hava zərbələrindən əvvəl İranın əlində silah səviyyəsinə (yüzdə 90) asanlıqla çatdırıla bilən yüzdə 60 saflıqda 400 kiloqramdan çox uranyumun olduğu təxmin edilirdi.

Dövlət katibi Marko Rubio martın 27-də verdiyi bəyanatda Vaşinqtonun hədəflərinə quru əməliyyatı olmadan da çata biləcəyini desə də, müdafiə naziri Pit Heqset martın 13-də hərbi variantın masada olduğunu açıq şəkildə ifadə etmişdi. Heqset qeyd etmişdi ki, uranyumun könüllü təhvil verilməsi ən yaxşı seçim olsa da, əks təqdirdə ABŞ ordusu müvafiq addımlar atmağa hazırdır. Hazırda Ağ Evin bu planı nə vaxt və hansı şəraitdə işə salacağı beynəlxalq birliyin diqqət mərkəzindədir, çünki bu, münaqişənin miqyasını quru müharibəsi səviyyəsinə qaldıra bilər.