BAKI, VOA, Fərid Mikayılov

İranla bağlı qarşıdurma fonunda dövlətlə əlaqəli və aktivist haker qruplar ABŞ və İsrailə qarşı genişmiqyaslı kiber hücumlar həyata keçirir.

VOA xəbər verir ki, bu hücumlar əsasən enerji infrastrukturu, sənaye sistemləri və kommunikasiya şəbəkələrini hədəf alır.

Məlumata görə, ABŞ-ın tibbi texnologiya şirkəti “Strayker”in qlobal şəbəkəsi kiber hücum nəticəsində zərər görüb. Hücumun İranla əlaqəli “Handala” qrupuna aid olduğu iddia edilir.

Kiber təhlükəsizlik platformalarının məlumatına əsasən, bəzi qruplar yüz minlərlə cihazın uzaqdan silindiyini və müxtəlif ölkələrdə sistemlərin sıradan çıxarıldığını iddia edir.

Ekspertlər bildirir ki, İranla əlaqəli “CyberAv3ngers”, “APT33” və “APT55” kimi qruplar su təchizatı, elektrik şəbəkələri və sənaye obyektlərini idarə edən sistemlərə hücumlar təşkil edir. Bu hücumlar fiziki infrastrukturun işini poza bilər.

Digər tərəfdən, ABŞ hərbi rəsmiləri də İranın rabitə və koordinasiya imkanlarını zəiflətmək üçün kiber əməliyyatlar həyata keçirdiklərini açıqlayıb. ABŞ-ın bu əməliyyatlarda süni intellekt və kiber texnologiyalardan istifadə etdiyi bildirilir.

Məlumatlara görə, münaqişə çərçivəsində “Kiber İslami Müqavimət” adlı haker koalisiyası formalaşıb və yüzlərlə hücumu koordinasiya edir. Bu qruplar Telegram platforması üzərindən fəaliyyətlərini əlaqələndirir.

Eyni zamanda, Rusiya, Yaxın Şərq və digər regionlardan olan haker qruplarının da münaqişəyə qoşulduğu qeyd olunur.

Analitiklər hesab edir ki, kiber hücumlar artıq ənənəvi hərbi əməliyyatlarla paralel şəkildə istifadə olunur və müasir müharibələrin ayrılmaz hissəsinə çevrilib.