BAKI, VOA, Nailə Babazadə

ABŞ Prezidenti Donald Tramp "Fox News" kanalına verdiyi müsahibədə Hörmüz boğazında artan gərginliyə toxunaraq, Vaşinqtonun bölgədəki hərbi mövqeyini daha da sərtləşdirəcəyinə dair mesajlar verib.

VOA xəbər verir ki, prezident bölgədəki ABŞ personalının təhlükəsizliyini təmin etmək üçün bütün hərbi variantların masada olduğunu vurğulayaraq, "Gərəkərsə müdaxilə edərik" deyib. Tramp hadisələrin gedişatı ilə bağlı "Nələr olacağını hamımız birlikdə görəcəyik" ifadəsini işlətməklə yanaşı, gələn həftə üçün planlaşdırılan əməliyyatların miqyasına dair "Onları çox sərt vuracağıq" xəbərdarlığını edib.

Proseslərin gedişatına dair ümidli olduğunu qeyd edən Tramp, "Ümid edirəm ki, hər şey çox yaxşı gedər" deyərək hərbi güc tətbiqinin diplomatik hədəflərə xidmət etdiyinə işarə edib. Lakin onun "çox sərt vuracağıq" mesajı ABŞ-ın İrana qarşı başlatdığı əməliyyatların ikinci və daha şiddətli mərhələsinə keçəcəyi ehtimalını artırıb. Bu bəyanatlar Hörmüz boğazı kimi strateji su yollarında dəniz nəqliyyatının təhlükəsizliyi ilə bağlı beynəlxalq narahatlıqları daha da alovlandırıb.

Ağ Ev rəhbərinin bu çıxışı İranın Körfəzdəki ABŞ müttəfiqlərinə və gəmiçilik marşrutlarına qarşı həyata keçirdiyi PUA və raket hücumlarından sonraya təsadüf edir. Analitiklər Trampın "gələn həftə" vurğusunu İranın enerji infrastrukturuna və ya qalan hərbi dəniz qüvvələrinə qarşı genişmiqyaslı hava zərbələri kimi qiymətləndirirlər. Hazırda ABŞ-ın bölgədəki hərbi bölmələri yüksək hazırlıq vəziyyətinə gətirilib və beynəlxalq ictimaiyyət Vaşinqtonun növbəti addımlarını diqqətlə izləyir.