BAKI, VOA, Nailə Babazadə

Ukrayna Prezidenti Volodimir Zelenski İngiltərə və Fransanın nüvə silahı verməsi ehtimalı ilə bağlı danışarkən, belə bir təklif almadıqlarını, lakin təklif olunarsa, bunu məmnuniyyətlə qəbul edəcəklərini bildirib. O, Rusiyanın bu mövzudakı ittihamlarının əsassız olduğunu qeyd edib.

VOA xəbər verir ki, cəbhədəki vəziyyəti dəyərləndirən Zelenski, itirilmiş torpaqları geri almağın hazırda böyük insan itkisi hesabına başa gələcəyini, lakin bu ərazilərdən imtina etməyəcəklərini vurğulayıb. Prezidentin sözlərinə görə, əsgərlərin geri çəkilməsi Rusiyanın daha 200 min insanı əsir götürməsi və qətlə yetirməsi deməkdir. O, bu bölgələrin həm Ukraynanın müdafiə xətti, həm də "qırmızı xətti" olduğunu deyib.

Donald Tramp ilə münasibətlərini "sadə və idarəolunan" kimi qiymətləndirən Zelenski, ABŞ-dakı seçkilərdən əvvəl sülh şansının daha yüksək olduğunu qeyd edib. O, Trampla son görüşündə Putinlə liderlər səviyyəsində üçtərəfli görüş təklif etdiyini və Trampın buna müsbət yanaşdığını bildirib. Zelenski Putinlə yalnız Rusiya və Belarusdan kənar neytral bir ərazidə görüşə biləcəyini vurğulayıb.

Rusiya enerji resurslarını daşıyan tankerlərə qarşı sanksiyaların yetərsiz olduğunu deyən Ukrayna lideri, təkcə gəmilərə deyil, heyət üzvlərinə də sanksiya tətbiq edilməsini tələb edib. Daxili siyasətə də toxunan Zelenski, ölkədə seçki keçirilməsi üçün atəşkəsin və təhlükəsizlik zəmanətinin mütləq olduğunu, hücum altında demokratik seçki prosesinin mümkünsüzlüyünü ifadə edib.