BAKI, VOA, Nailə Babazadə

İran Prezidenti Məsud Pezeşkian ölkəsinin nüvə proqramı ətrafında yaranan mübahisələrə toxunaraq, Tehranın nüvə silahı istehsal etmək niyyətində olmadığını bir daha vurğulayıb.

VOA xəbər verir ki, İran dövlət televiziyasının məlumatına görə, Mazandaran əyalətinin Planlaşdırma və İnkişaf Şurasının iclasında çıxış edən Pezeşkian, ölkənin ali rəhbəri Əli Xameneinin bu mövzudakı fətvasına və açıqlamalarına diqqət çəkib. O, dini liderin sözlərinin siyasi manipulyasiya olmadığını qeyd edib.

"Cəmiyyətin lideri siyasətçilər kimi yalan danışmaz. O, nüvə silahımızın olmayacağını deyirsə, deməli, həqiqətən də olmayacaq."- deyə Pezeşkian qeyd edib.

ABŞ Prezidenti Donald Trampın "İran nüvə silahına sahib olmayacağını bəyan etməlidir" şəklindəki çağırışlarına da cavab verən Pezeşkian, bu mövqeyi artıq dəfələrlə açıqladıqlarını xatırladıb.

Xatırladaq ki, bundan əvvəl ABŞ vitse-prezidenti Ceyms Devid Vens (JD Vance) Donald Trampın bu məsələdə mövqeyinin qəti olduğunu bildirərək, "Prezidentin mesajı çox aydındır: İran nüvə silahına sahib ola bilməz" ifadələrini işlətmişdi. Pezeşkiyanın bu son açıqlaması Vaşinqtondan gələn təzyiqlərə rəsmi Tehranın növbəti diplomatik reaksiyası kimi qiymətləndirilir.