BAKI, AzerVoice, Nailə Babazadə

İsrailin müdafiə naziri İsrail Katz Afinada yunan həmkarı Nikos Dendias ilə bir araya gələrək iki ölkə arasında 3,5 milyard avroluq yeni silah sazişini müzakirə edib.

AzerVoice xəbər verir ki, Yunanıstan Müdafiə Nazirliyində baş tutan görüşdə tərəflər hərbi əməkdaşlığın strateji səviyyəyə qaldırılması barədə razılığa gəliblər. Müzakirələrin əsas mövzusu Yunanıstanın Türkiyə ilə quru sərhədində (Meriç), həmçinin Ege və Şərqi Aralıq dənizində "Aşil qalxanı" adı altında 5 fərqli növ silah sisteminin yerləşdirilməsi layihəsi olub. Bu çərçivədə İsrail istehsalı olan "Barak MX", "Davudun sapandçı" və "Spyder" tipli raket sistemlərinin, eləcə də müasir radar avadanlıqlarının alınması prosesinin sürətləndirilməsi qərara alınıb.

Qeyd edək ki, Afina ötən il İsraildən 691 milyon avro dəyərində 36 ədəd "Puls" tipli çoxmənzilli raket sisteminin alınmasına qərar vermişdi. Görüş zamanı İsrailin müdafiə naziri Katz Türkiyəyə qarşı kəskin və qeyri-etik ifadələr işlətməklə diqqət çəkib. Bu hərbi yaxınlaşma regionda güclər nisbətinə təsir edə biləcək mühüm addım kimi qiymətləndirilir. Görüş Qüdsdə keçirilən İsrail-Yunanıstan-Kipr üçtərəfli sammitindən təxminən bir ay sonraya təsadüf edib.