BAKI, AzerVoice, Nailə Babazadə
İran bazar ertəsi günü raket proqramının sırf müdafiə məqsədi daşıdığını və hücumların qarşısını almağa yönəldiyini bəyan edərək, ölkənin raket arsenalının müzakirə mövzusu olmadığını bildirib.
AzerVoice xəbər verir ki, İran Xarici İşlər Nazirliyinin sözçüsü İsmayıl Bəqayi həftəlik mətbuat konfransında bildirib ki, ölkənin raket proqramı İran ərazisini qorumaq məqsədilə hazırlanıb və danışıqlar predmeti deyil.
“İranın raket proqramı ölkənin ərazi bütövlüyünü müdafiə etmək üçün inkişaf etdirilib, bu, müzakirə mövzusu deyil. Aqressorları İranı hədəfə almaq fikrindən daşındırmaq üçün nəzərdə tutulan müdafiə imkanlarımız danışıla bilməz,” – deyə Bəqayi vurğulayıb.
Qeyd edək ki, İsrail iyun ayında baş verən və 12 gün davam edən müharibə zamanı İranın ballistik raketlərini və nüvə proqramını zərərsizləşdirmək istədiyi iki əsas təhdid kimi təqdim edib.
İranın ballistik imkanları İsraili hədəf məsafəsində saxlayır. İsrailin müharibəyə səbəb olan misli görünməmiş hücumlarından sonra Tehran İsrail şəhərlərinə doğru raket və pilotsuz uçuş aparatları ilə cavab zərbələri endirib.
ABŞ-ın NBC telekanalının məlumatına görə, İsrail İranın müharibədən sonra raket istehsalını bərpa etməyə və genişləndirməyə çalışmasından getdikcə daha çox narahatlıq keçirir və bu səylərin qarşısını almaq üçün yenidən hücum variantlarını nəzərdən keçirir.
Məlumata əsasən, İsrailin baş naziri Benyamin Netanyahu bu ayın sonunda ABŞ-a planlaşdırılan səfəri zamanı Prezident Donald Trampa ABŞ-ın mümkün yeni hərbi əməliyyatlara qoşulması və ya dəstək verməsi ilə bağlı variantlar təqdim etməyi planlaşdırır. Bu barədə birbaşa məlumatlı mənbə və keçmiş ABŞ rəsmilərinə istinadən NBC xəbər yayıb.
Son müharibə zamanı İsrail İranın hərbi obyektlərinə, nüvə təsisatlarına və yaşayış məntəqələrinə zərbələr endirib. Hücumlar nəticəsində mindən çox insan həlak olub. İsrail tərəfi isə İranın ərazisinə 50-dən çox raketin düşdüyünü, bunun nəticəsində 28 nəfərin öldüyünü açıqlayıb.
ABŞ qısa müddətə İsraillə birlikdə İranın nüvə obyektlərinə zərbələr endirib, daha sonra isə atəşkəs elan olunub.
Xatırladaq ki, İran bir zamanlar silahlarının böyük hissəsini ABŞ-dan alırdı. Lakin 1979-cu il İslam İnqilabından sonra diplomatik münasibətlərin kəsilməsi fonunda ölkə öz daxili silah sənayesini inkişaf etdirməyə məcbur olub.