BAKI, AzerVoice, Nailə Babazadə

Fars Körfəzi Əməkdaşlıq Şurası (GCC) İsrail parlamentinin - Knessetin - Qərb sahilində İsrail suverenliyinin tətbiqinə dair qanun layihəsini ilkin oxunuşda təsdiqləməsini kəskin şəkildə pisləyib.

AzerVoice xəbər verir ki, cümə axşamı yayılan bəyanatda GCC bu addımın bölgədə sabitlik və təhlükəsizliyi daha da pozduğunu bildirib.

Təşkilatın baş katibi Casim əl-Budayvi bəyan edib ki, bu cür addımlar “beynəlxalq hüququn açıq şəkildə pozulması və beynəlxalq ictimaiyyətin ədalətli və hərtərəfli sülhə nail olmaq səylərinin aşkar şəkildə sarsıdılmasıdır”.

Budayvi vurğulayıb ki, “bu tip məskunlaşma siyasəti fələstinlilərin tarixi hüquqlarına açıq təcavüzdür və beynəlxalq qanunları kobud şəkildə pozur”.

Baş katib beynəlxalq ictimaiyyəti “öz hüquqi və siyasi məsuliyyətlərini yerinə yetirməyə, İsrail hakimiyyətinə bu təhlükəli eskalasiya addımlarını dayandırmaq üçün təzyiq göstərməyə” çağırıb.

Xatırladaq ki, İsrail Knesseti çərşənbə günü Qərb sahilində suverenliyin tətbiqini nəzərdə tutan qanun layihəsini ilkin səsvermədə təsdiqləyib. Layihə parlamentin xarici işlər və müdafiə komitəsinə müzakirə üçün göndəriləcək.

Qanunun qüvvəyə minməsi üçün sənədin daha üç oxunuşda səsvermədən keçməsi tələb olunur.