BAKI, AzerVoice, Nailə Babazadə
ABŞ Prezidenti Donald Tramp bildirib ki, əgər HƏMAS hərəkatı Qəzzada insanları öldürməyə davam etsə, “ştatların onları öldürməkdən başqa seçimimiz qalmayacaq”.
AzerVoice xəbər verir ki, bu barədə “Reuters” agentliyi dövlət başçısının Truth Social platformasındakı paylaşımına istinadla məlumat yayıb.
“Əgər HƏMAS Qəzzada insanları öldürməyə davam etsə - bu, razılaşmada nəzərdə tutulmamışdı - bizim başqa seçimimiz olmayacaq, ora gedib onları öldürəcəyik,” – deyə Tramp yazıb.
Əvvəllər Tramp HƏMAS-ın həyata keçirdiyi əməliyyatları cinayətkarlığa qarşı mübarizə ilə müqayisə etmişdi. Həftənin əvvəlində o demişdi: “Onlar çox təhlükəli olan bəzi dəstələri aradan qaldırdılar, həmin dəstələrin üzvlərini öldürdülər. Açığı, bu məni o qədər də narahat etmədi.”
Prezident hansı qüvvənin HƏMAS-a qarşı əməliyyat keçirə biləcəyini açıqlamayıb. Halbuki o, çərşənbə günü bəyan etmişdi ki, ABŞ ordusu Qəzzaya müdaxilə etməyəcək.
Vaşinqtonun vasitəçiliyi ilə imzalanan atəşkəs sazişinə əsasən İsrail qüvvələrinin Qəzzadan qismən çıxmasından sonra HƏMAS dağıdılmış şəhərlərdə nəzarəti gücləndirib, “xain” və ya “casus” adlandırdığı şəxslərin küçələrdə edamını həyata keçirib.
ABŞ-ın Mərkəzi Komandanlığının (CENTCOM) Yaxın Şərq üzrə rəhbəri general Bred Kuper çərşənbə günü HƏMAS-ı “fələstinli mülki şəxslərə qarşı atəş açmağı dərhal dayandırmağa” və Tramp planının icrasına əməl etməyə çağırıb.
Bununla belə, Tramp bu edam xəbərlərinə indiyədək xüsusi reaksiya verməyib. O, çərşənbə axşamı Ağ Evdə deyib ki, :“Düzünü desəm, bu məni çox narahat etmir. Problem deyil. Bu, çox pis dəstələrdir. Bu, digər ölkələrdəki vəziyyətdən tamamilə fərqlidir.”
Tramp bazar ertəsi Qəzza atəşkəsini qeyd etmək məqsədilə İsrailə və Misirə səfəri zamanı bildirib ki, HƏMAS “bölgədəki problemlərə son qoymaq” ideyasına açıqdır. “Onlar bu məsələyə açıq yanaşdılar. Biz onlara müəyyən vaxt verdik,” – deyə o, prezident təyyarəsində jurnalistlərə açıqlama verib.
Tramp eyni zamanda bildirib ki, HƏMAS-ın saxladığı bəzi girovların cəsədləri İsrailə qaytarılıb, lakin hərəkatın atəşkəs razılaşmasına əməl etməməsi halında ABŞ dəstəkli addımların qaçılmaz ola biləcəyini vurğulayıb.
HƏMAS-ın Qərb Sahilindəki rəhbəri Zahir Cəbbərin bəyan edib ki, hərəkat Qəzzada müharibənin dayandırılmasını təmin edən sazişə sadiqdir.
“Biz hərəkat olaraq müharibənin dayandırılmasını, xalqımızın təcavüzdən qorunmasını və bərpa prosesinin başlanmasını təmin edən sazişin icrasına sadiqik. Həmçinin xalqımız üzərində istənilən beynəlxalq nəzarət formasını rədd edirik.”-deyə Cəbbərin çıxışında bildirib.