BAKI, AzerVoice, Nailə Babazadə
İran Ali Milli Təhlükəsizlik Şurasının sədri Əli Laricani, ABŞ-ın İranın raket proqramı ilə bağlı irəli sürdüyü şərtlərin nüvə danışıqlarını mənfi təsirə məruz qoyduğunu bildirib.
AzerVoice xəbər verir ki,İranın rəsmi xəbər agentliyi IRNA-nın məlumatına görə, Laricani İran Ticarət və Sənaye Palatasında çıxışı zamanı Qərblə aparılan nüvə danışıqlarında irəliləyişin olmamasına dair açıqlamalar verib. O bildirib ki, ABŞ danışıqlarda İranın raketlərinin uçuş məsafəsinin 500 kilometrdən aşağı salınmasını tələb edir.
“Bunu bir iranlı qəbul edə bilərmi? Problem onların qeyri-məqbul və əsassız tələblər irəli sürmələridir,” – deyə Laricani vurğulayıb.
O əlavə edib ki, İran danışıqlardan yayınmır, lakin bəzi Qərb ölkələrinin, xüsusilə də İngiltərə, Almaniya və Fransanın BMT sanksiyalarını yenidən tətbiq etməyə imkan verən “snapback” mexanizmini gündəmə gətirməsi danışıqlara mənfi təsir göstərir.
Təxminən 30 ildir raket proqramını inkişaf etdirən İran, hazırda məsafəsi 300 ilə 3 min kilometr arasında dəyişən müxtəlif növ ballistik raketlərə malikdir. Bu raketlər kimyəvi, nüvə və bioloji başlıqlar daşımaq qabiliyyətinə sahibdir və İranın Avropa, Asiya, Afrika və Orta Şərqdəki geniş əraziləri vurmaq imkanının olduğu bildirilir.
İranın bu hərbi potensialı, başda İsrail olmaqla bir sıra ölkələr tərəfindən ciddi təhdid kimi qiymətləndirilir.