BAKI, AzerVoice, Nərmin Ağayeva

Avropada bəzi ölkələr işçilərinə bir aydan çox ödənişli məzuniyyət imkanı yaradır.

AzerVoice xəbər verir ki, CNBC-nin məlumatına görə, işçilərinə ən uzun illik məzuniyyət verən 9 Avropa ölkəsi arasında Fransa, Böyük Britaniya, Avstriya, Danimarka, Finlandiya, Norveç, İspaniya, İsveç və Portuqaliya var. Bu ölkələrdə ödənişli məzuniyyət müddəti 22 gündən 30 günə qədər dəyişir.

Fransada işçilərə 30 gün ödənişli məzuniyyət təqdim olunur. Böyük Britaniya 28 gün, Avstriya, Danimarka, Finlandiya, Norveç, İspaniya və İsveç isə 25 günlə bu siyahıda yer alır. Portuqaliyada isə bu göstərici 22 gündür.

Mütəxəssislər hesab edir ki, Avropada iş-həyat balansına və istirahətə verilən önəm işçilərin daha uzunmüddətli məzuniyyət hüququ ilə nəticələnib. Məsələn, İsveçdə bəzi şirkətlər qanuni məzuniyyət günlərinə əlavə edərək əməkdaşlarına 30 günlük ödənişli istirahət imkanı verir. Norveçdə isə işçilərdən yay mövsümündə ən azı üç həftəlik məzuniyyət götürmələri tələb olunur.

Qeyd edək ki, Türkiyədə işçilər orta hesabla 14 gün rəsmi tətil və 14 gün ödənişli məzuniyyət olmaqla ümumilikdə 28 günlük məzuniyyət hüququna malikdirlər. ABŞ-da isə bu rəqəm cəmi 10 gün təşkil edir ki, bu da dünya üzrə ən aşağı göstəricilərdən biridir.