BAKI,VOA,Yusif Şərifzadə

ABŞ Mərkəzi Komandanlığı (CENTCOM) İrana qarşı tətbiq etdiyi dəniz blokadasının davam etdiyini və bu çərçivədə yeni tədbirlərin görüldüyünü açıqlayıb.

VOA xəbər verir ki, CENTCOM-un "X" sosial şəbəkəsində yaydığı məlumata görə, ABŞ qüvvələri 49 kommersiya gəmisinin marşrutunu dəyişdirərək onları İran limanlarından uzaqlaşdırıb.

Açıqlamada həmçinin bildirilib ki, ABŞ hərbçiləri iki gəmini hərəkətsiz vəziyyətə salıb, daha iki gəmiyə isə baxış keçiriblər.

CENTCOM-un məlumatına görə, blokadanın məqsədi gəmilərin İran limanlarından istifadə etməsinin qarşısını almaq və Tehranın təhlükəsiz keçid üçün tətbiq etdiyi ödənişlərdən əldə etdiyi gəlirləri məhdudlaşdırmaqdır.

ABŞ administrasiyası hesab edir ki, bu addımlar İranı danışıqlar masasına qayıtmağa təşviq etmək məqsədi daşıyır.

İran tərəfi isə daha əvvəl ABŞ-ın bölgədəki hərbi fəaliyyətini və dəniz blokadasını beynəlxalq hüququn pozulması kimi qiymətləndirmişdi.

Vaşinqton və Tehran arasında Hörmüz boğazında gəmiçilik və təhlükəsizlik məsələləri ilə bağlı diplomatik gərginlik davam edir.