BAKI,VOA,Yusif Şərifzadə

Çinin korrupsiyaya qarşı mübarizə qurumu ölkədə mətbuata nəzarət sahəsində yüksək vəzifələr tutmuş Tsay Fuçao barəsində araşdırma başladığını açıqlayıb.

VOA xəbər verir ki, bu barədə Çinin korrupsiyaya qarşı mübarizə üzrə nəzarət qurumu çərşənbə günü məlumat yayıb.

Açıqlamada 75 yaşlı Tsay Fuçaonun intizam qaydalarını və qanunları ciddi şəkildə pozmaqda şübhəli bilindiyi qeyd olunub. Lakin ona qarşı irəli sürülən konkret ittihamlar barədə ətraflı məlumat verilməyib.

Keçmiş jurnalist olan Tsay Fuçao 2010-cu illərdə Çində mətbuatın və yayım sahəsinin Kommunist Partiyasının siyasi xəttinə uyğun fəaliyyət göstərməsinə nəzarət edib.

O, ölkə üzrə nəşriyyat, televiziya, radio, kino və internet məzmununa cavabdeh olan dövlət qurumuna rəhbərlik edib. Tsay Fuçao bu vəzifədə olduğu müddətdə mətbuatda senzura siyasətinin həyata keçirilməsinə, ictimai rəyin yönləndirilməsinə və yaradıcılıq sahəsində dövlət siyasətinin tətbiqinə nəzarət edib.

O, həmçinin Çinin dövlət televiziya və radio qurumlarına rəhbərlik edib. Tsay Fuçao vaxtilə ölkədə hazırlanan bir sıra televiziya verilişlərinin, filmlərin və nəşrlərin aşağı səviyyədə olduğunu bildirmiş, mənəvi dəyərlərə zidd mövzuların aradan qaldırılmasına çağırmışdı.

Tsay Fuçao Çin Kommunist Partiyası Təbliğat Şöbəsinin rəhbər müavini və Mətbuat, Nəşriyyat, Radio, Kino və Televiziya üzrə Dövlət İdarəsinin rəhbəri vəzifələrində çalışıb. O, 2018-ci ildə bütün dövlət vəzifələrindən ayrılıb.

Keçmiş məmur Çin Sədri Si Cinpin tərəfindən başladılmış uzunmüddətli korrupsiyaya qarşı mübarizə çərçivəsində araşdırılan son yüksək vəzifəli şəxslərdən biridir.