BAKI,VOA,Yusif Şərifzadə

Avropa Komissiyasının sədri Ursula fon der Lyayen İsrailin Livanın suverenliyinə və ərazi bütövlüyünə hörmət göstərməsinin vacibliyini bəyan edib.

VOA xəbər verir ki, Ursula fon der Lyayen bu barədə Avropa İttifaqı Şurasının sədri Antonio Koşta ilə birgə keçirdiyi mətbuat konfransında danışıb. O bildirib ki, Avropa İttifaqı liderləri iki gün davam edən zirvə toplantısında Yaxın Şərqdəki son hadisələri geniş müzakirə ediblər.

Ursula fon der Lyayen ABŞ ilə İran arasında əldə olunmuş anlaşma memorandumunun mühüm imkan yaratdığını qeyd edib. Onun sözlərinə görə, bu razılaşma Hörmüz boğazında sərbəst gəmiçiliyin təmin edilməsinə, İranın nüvə silahı əldə etməsinin qarşısının alınmasına və regional təhlükəsizliyin gücləndirilməsinə töhfə verə bilər.

Avropa Komissiyasının sədri Livandakı vəziyyətin ciddi narahatlıq doğurduğunu da vurğulayıb. O bildirib ki, sülh və sabit Yaxın Şərq üçün güclü, suveren və sabit Livan mühüm əhəmiyyət daşıyır.

Ursula fon der Lyayen qeyd edib ki, Avropa İttifaqı Livan hakimiyyətinin Hizbullahın silahsızlaşdırılmasına yönəlmiş səylərini dəstəkləyir. O əlavə edib ki, eyni zamanda İsrailin Livanın həm suverenliyinə, həm də ərazi bütövlüyünə hörmət etməsi vacibdir.

Antonio Koşta isə ABŞ və İran arasında əldə olunmuş razılaşmanı mühüm dönüş nöqtəsi adlandırıb. Onun sözlərinə görə, bu razılaşma Hörmüz boğazının açılmasına, bölgədə davamlı sülhün və sabitliyin möhkəmlənməsinə, eləcə də Livanın suverenliyinə tam hörmət göstərilməsinə şərait yaratmalıdır.