BAKI,VOA,Yusif Şərifzadə

İsrail ordusu Livanın cənubunda yerləşən bir sıra ərazilərə yeni hücumlar həyata keçirib. Livanın Milli Xəbər Agentliyinin (NNA) məlumatına görə, Bint Cübeyl bölgəsindəki Aynata və Həddasə kəndlərinin ətrafı artilleriya atəşinə tutulub.

VOA xəbər verir ki, İsrail ordusunun artilleriya bölmələri Aynata və Həddasə kəndlərinin kənarlarını hədəfə alıb. Hücumların vurduğu ziyanın miqyası barədə ilkin məlumat verilməyib.

NNA, həmçinin Livanın cənubunda İsrail pilotsuz uçuş aparatı ilə bağlı daha bir hadisənin baş verdiyini bildirib.

Agentliyin məlumatına görə, dağıdılmış binanın dağıntılarını təmizləyən ekskavatorun üzərində uçan İsrail pilotsuz uçuş aparatı partlayıb.

Hadisə zamanı ekskavatorun işlədiyi ərazidə insanların olub-olmaması və mümkün xəsarətlər barədə məlumat açıqlanmayıb.

İsrail ordusunun artilleriya hücumlarının və pilotsuz uçuş aparatı ilə bağlı hadisənin səbəbləri barədə də hələlik ətraflı açıqlama verilməyib.

Son hücumlar Livanın cənubunda gərginliyin davam etdiyi və müxtəlif yaşayış məntəqələrinin İsrail qüvvələrinin zərbələrinə məruz qaldığı bir vaxtda qeydə alınıb.