BAKI,VOA,Yusif Şərifzadə

ABŞ və İran arasında ritorikanın sərtləşdiyi bir vaxtda Pakistanın vasitəçilik rolu tərəflərin yenidən diplomatik danışıqlara qayıtmasını asanlaşdıra bilər. Lahor Universitetinin Sosial Elmlər fakültəsinin dekanı Rabia Axtar hesab edir ki, qarşıdurma tərəfləri arasında ritorika pisləşdikcə vasitəçiliyin əhəmiyyəti daha da artır.

VOA xəbər verir ki, Rabia Axtar açıqlamasında Pakistanın nə Vaşinqtonda, nə də Tehranda danışıqlar üçün zəruri siyasi iradəni özü yarada biləcəyini bildirib. Bununla belə, İslamabad diplomatiyaya qayıdışın tərəflər üçün siyasi baxımdan daha məqbul olmasına kömək edə bilər.

“Pakistan Vaşinqtonda və ya Tehranda həmin siyasi iradəni yarada bilməz. Lakin diplomatiyaya qayıtmağın qiymətini aşağı sala bilər”, – Axtar deyib.

Ekspertin fikrincə, əsas problemlərdən biri həm ABŞ-nin, həm də İranın danışıqlar masasına hərbi və ya iqtisadi təzyiq nəticəsində qayıtmış tərəf kimi görünmək istəməməsidir.

Belə vəziyyətdə danışıqların bərpası tərəflərdən birinin geri çəkilməsi və ya qarşı tərəfin təzyiqinə boyun əyməsi kimi təqdim oluna bilər. Bu isə həm Vaşinqton, həm də Tehran üçün daxili və xarici siyasi baxımdan əlavə çətinlik yaradır.

Axtar hesab edir ki, Pakistanın vasitəçiliyi məhz bu problemi aradan qaldırmağa yönələ bilər. İslamabad tərəflərin təmkin nümayiş etdirməsinə və danışıqlara qayıtmasına imkan verən diplomatik mexanizm formalaşdırmağa çalışa bilər.

“Pakistan elə bir yolun yaradılmasına kömək etməlidir ki, hər iki tərəf ictimaiyyət qarşısında geri çəkilməkdə ittiham edilmədən təmkin göstərə bilsin”, – ekspert bildirib.

Beləliklə, Pakistanın mümkün vasitəçiliyinin əsas məqsədi ABŞ və İranın mövqelərini dəyişdirməkdən daha çox, onların siyasi nüfuzlarını itirmədən yenidən diplomatik prosesə qoşula biləcəkləri şərait yaratmaq ola bilər.