BAKI,VOA, Fərid Mikayılov

ABŞ dövlət katibi Marko Rubio İrana qarşı həyata keçirilən “Epik Qəzəb” adlı hərbi əməliyyatın başa çatdığını bildirib.

VOA xəbər verir ki, Rubio qeyd edib ki, hazırda ABŞ qüvvələri Hörmüz boğazında təhlükəsizliyin təmin olunmasına yönəlmiş müdafiə xarakterli əməliyyatlarda iştirak edir.

Onun sözlərinə görə, ABŞ yalnız təhdid yarandığı halda cavab tədbirləri görəcək.

Nazir vurğulayıb ki, əməliyyat qarşıya qoyulan məqsədlərə nail olunması ilə yekunlaşıb və bu, beynəlxalq gəmiçiliyin bərpası istiqamətində ilk addım kimi qiymətləndirilir.

Bildirilib ki, ABŞ yaxın günlərdə BMT Təhlükəsizlik Şurasına yeni qətnamə layihəsi təqdim edəcək. Layihə Hörmüz boğazında gəmiçiliyin təhlükəsizliyinin təmin olunmasını və İranın hücum fəaliyyətlərinin dayandırılmasını nəzərdə tutur.

Məlumata əsasən, sənəd İranın dəniz minaları ilə bağlı məlumatları açıqlamasını və onların zərərsizləşdirilməsi prosesində əməkdaşlıq etməsini də tələb edir.

Qeyd edək ki, sözügedən təşəbbüsə Bəhreyn, Səudiyyə Ərəbistanı, Birləşmiş Ərəb Əmirlikləri, Küveyt və Qətər dəstək verir.