BAKI,VOA, Fərid Mikayılov

ABŞ Prezidenti Donald Tramp Rusiyaya məxsus neft tankerinin Kubaya yanacaq çatdırmasına etiraz etmədiyini bildirib.

VOA xəbər verir ki, Tramp jurnalistlərə açıqlamasında qeyd edib ki, Kubaya humanitar məqsədlərlə neft göndərilməsinə qarşı deyil.

“Əgər hər hansı ölkə hazırda Kubaya neft göndərmək istəyirsə, bunun Rusiya olub-olmamasının fərqi yoxdur, mənim üçün problem deyil”- deyə o bildirib.

Məlumata görə, Rusiyaya məxsus “Anatoliy Kolodkin” adlı tanker Kubanın Matansas limanına təxminən 730 min barrel neftlə çatıb. ABŞ, Avropa İttifaqı və Böyük Britaniya tərəfindən sanksiyaya məruz qalan gəminin yükü “humanitar yardım” kimi təqdim olunur.

Kremlin sözçüsü Dmitri Peskov isə bildirib ki, Rusiya bu addımı Kuba xalqına dəstək məqsədilə atır və məsələ əvvəlcədən ABŞ ilə müzakirə olunub.

Qeyd edək ki, ABŞ-ın tətbiq etdiyi neft blokadası səbəbindən Kubada ciddi enerji böhranı yaşanır. Ölkədə genişmiqyaslı elektrik kəsintiləri müşahidə olunur, yanacaq qıtlığı isə nəqliyyat və səhiyyə sisteminə mənfi təsir göstərir.