BAKI,VOA, Fərid Mikayılov

Yaponiyada özünü aktiv hərbçi kimi təqdim edən bir şəxs Çin Xalq Respublikasının Tokiodakı səfirliyinə daxil olaraq diplomatları ölüm təhlükəsi ilə hədələyib.

VOA xəbər verir ki, Çin Xarici İşlər Nazirliyinin sözçüsü Lin Cien Pekində keçirilən mətbuat konfransında bildirib ki, şəxs səhər saatlarında səfirliyin binasına zorla girərək diplomatları “Tanrı adına” öldürməklə hədələyib.

Lin, hadisəni “təbiəti və təsiri baxımından son dərəcə dəhşətli” adlandırıb.

Sözçü, Vyana Konvensiyasının ciddi şəkildə pozulduğunu vurğulayaraq, Çin diplomatlarının və səfirliyin təhlükəsizliyinin təhdid olunduğunu qeyd edib və Yaponiyaya diplomatik kanallar vasitəsilə etiraz notası göndərildiyini açıqlayıb.

Hadisəni törədən şəxsin Yaponiyanın Öz Müdafiə Quru Qüvvələri ilə əlaqəli olduğu güman edilir. Hadisə yerində bıçaq aşkar edilib, lakin Çin diplomatlarına xəsarət dəyməyib. Tokyo Metropol Polis İdarəsi hadisəni araşdırır.

Hadisə, Çin və Yaponiya arasında Tayvan məsələsinə görə yaranan diplomatik gərginliyin fonunda baş verib. Yaponiya Baş naziri Takaiçi Sanae-nin Tayvana hərbi müdaxilə ehtimalını açıq şəkildə gündəmə gətirməsi Pekin tərəfindən etirazla qarşılanmışdı.