BAKI, AzerVoice
Fransa uşaqlarını qorumaq üçün radikal addım atdı. Parlamentdə sabaha qədər davam edən marafon iclasda millət vəkilləri sosial media platformalarının uşaqlar üçün yaratdığı təhlükələrə qarşı "dur" deyib.
AzerVoice-un məlumatına görə, Fransa Parlamenti bazar ertəsi günü 15 yaşından kiçik uşaqların sosial media platformalarından istifadəsini qadağan edən qanun layihəsini böyük səs çoxluğu ilə qəbul edib. 130 deputatın lehinə, cəmi 21 deputatın əleyhinə səs verdiyi bu qərar Prezident Emmanuel Makron tərəfindən uşaqların rəqəmsal asılılıqdan qorunması yolunda "böyük addım" kimi qiymətləndirilib.
Makron rəsmi "X" hesabında qərarı alqışlayaraq, uşaqların və yeniyetmələrin Amerika platformaları və ya Çin alqoritmlərinin oyuncağına çevrilməsinə icazə verməyəcəklərini bildirib.
"Uşaqlarımızın hissləri nə Amerika platformaları, nə də Çin alqoritmləri tərəfindən satıla və ya manipulyasiya edilə bilməz."-deyə o yazıb.
Qadağa nələri əhatə edir?
Yeni qanunvericilik təkcə sosial media platformalarını deyil, həm də orta məktəblərdə mobil telefonların tamamilə yasaqlanmasını nəzərdə tutur. Fransa bu addımı ilə Avstraliyadan (hansı ki, 16 yaş həddi qoyub) sonra dünyada bu cür kəskin tədbir görən ikinci ölkə oldu.
Qanun layihəsi Senat tərəfindən təsdiqlənərsə, 1 sentyabr 2026-cı il tarixindən etibarən tam tətbiq olunacaq. Sosial media nəhənglərinə (TikTok, Snapchat, Instagram və s.) cari ilin dekabrın 31-nə qədər vaxt verilib ki, yaş həddinə uyğun olmayan mövcud hesabları bloklasınlar.
Fransanın Qida, Ətraf Mühit və Sağlamlıq Agentliyinin (ANSES) hesabatına görə, sosial şəbəkələr yeniyetmələrin, xüsusilə də gənc qızların psixi sağlamlığına birbaşa mənfi təsir göstərir. Kiber-bullinq (onlayn təhqir), zorakı məzmunlara məruz qalma və ekran qarşısında həddindən artıq vaxt keçirmə əsas risk faktorları kimi göstərilir.
Qanunun icrası üçün istifadəçilərin yaşını dəqiq müəyyən edən effektiv yoxlama sistemi qurulacaq. Hazırda bu texnologiya Avropa səviyyəsində inkişaf etdirilir və platformalar üçün icbari olacaq.