BAKI, AzerVoice, Orxan Qədirzadə

Qonşu ölkələrdən Suriyaya qayıdan qaçqınların sayı 1 milyon 290 min nəfərə çatıb.

AzerVoice xəbər verir ki, bu barədə Türkiyənin daxili işlər naziri Əli Yerlikaya, Suriyaya könüllü geri dönüşlərlə bağlı sosial media hesabında etdiyi paylaşımında bildirib. Nazir bildirib ki, 8 dekabr 2024-dən bu günə qədər isə 550 min suriyalı öz ölkəsinə qayıdıb.

Nazir həmçinin qeyd edib ki, Suriya daxilində 8 dekabr 2024-dən sonra yaşanan siyasi dəyişikliklər geri dönüşləri sürətləndirib.

Nazir Türkiyənin qaçqınlara dəstəyini xatırladaraq “zülm, aclıq və müharibə şəraitində qalan insanlara heç vaxt arxa çevirmədik, onların səsini eşitməməzlikdən gəlmədik. Həmişə haqqın və məzlumun yanında olduq.”- deyib.

“Suriyalı qardaşlarımızın vətən həsrəti sona çatır. Geri qayıdan insanlar həm sevinci, həm də uzun ayrılığın kədərini yaşayır.”- deyə nazir bildirib.

Yerlikaya, Suriya ilə Türkiyə arasında koordinasiya edilən geri dönüş prosesinin humanitar prinsiplərə əsaslandığını qeyd edib.

Yerlikaya, geri dönüş prosesinin Göç İdarəsi tərəfindən bütün şəhərlərdə diqqətlə icra edildiyini, Türkiyənin bu sahədə dünyada nümunəvi model tətbiq etdiyini vurğulayıb.

“Ölkəmiz humanitar yanaşması, tarixi təcrübəsi və rasional göç idarəçiliyi ilə dünyada nümunə göstərilir. Könüllü geri dönüşlər böyük həssaslıqla həyata keçirilir.”-deyə Yerlikaya bildirib.