BAKI, AzerVoice, Səməd Əyyubov

Böyük Britaniyada Fələstin tərəfdarı qruplardan olan “Əl-Əqsa Dostları” İsrail prezidenti İsxaq Hersoq barəsində həbs qərarı çıxarılması üçün məhkəməyə müraciət edib.

AzerVoice xəbər verir ki, bu barədə təşkilatın sədri İsmayıl Patel açıqlama verib.

O, Hersoqun Qəzzadakı mülki şəxslərə qarşı həyata keçirilən hücumları təşviq etməkdə ittiham olunduğunu və bu səbəbdən cinayət işi prosesi başladıldığını bildirib.

Patel qeyd edib ki, Baş prokurorluğa Hersoq haqqında həbs qərarı çıxarılması üçün müraciət edilib. Onun sözlərinə görə, müraciət və ittihamlar Hersoqun 2023-cü ilin 12 və 15 oktyabr tarixlərində verdiyi iki açıqlamaya əsaslanır. Qəzzadakı mülki şəxslərə və obyektlərə qarşı edilən hücumlarla bağlı olan bu açıqlamaların bəzi hissələri İsrailin hərbi rəsmiləri tərəfindən dəfələrlə təkrar olunub.

“İngilis siyasətçiləri fələstinliləri müdafiə etməkdə və hüquqa sadiqlik göstərməkdə uğursuz oldular. Məhkəmələrin indi siyasətçilərin bacarmadığı bir məsələyə müdaxilə etmək imkanı var. İngiltərə hüquq-mühafizə orqanlarının Hersoqu həbs etməsi üçün müraciət etdik. Rütbəsindən asılı olmayaraq hər bir rəhbər mülki şəxslərə qarşı hücumlara görə cavab verməlidir. Bu cür ağır cinayətlərdə, Beynəlxalq Cinayət Məhkəməsinin də qeyd etdiyi kimi, toxunulmazlıq yoxdur” - deyə Patel, Hersoqun bütün fələstinliləri hədəf alan açıqlamalarını xatırladaraq bildirib.

Qeyd edək ki, Hersoq 10–12 sentyabr tarixlərində Böyük Britaniyada rəsmi görüşlər keçirəcək.