BAKI, AzerVoice, Nailə Babazadə

Yaponiya İsrailin bölgədə sülh prosesinin yenidən başlanmasına mane olacaq bütün hərəkətləri dərhal dayandırmalı olduğunu bildirib.

AzerVoice xəbər verir ki, Tokio hökumətindən verilən açıqlamaya görə, Yaponiyanın xarici işlər naziri İvaya Takeşi İsrailin xarici işlər naziri Gideon Saar ilə telefon danışığı aparıb.

35 dəqiqə davam edən görüş zamanı İvaya İsrailin hərbi əməliyyatlarının bölgədə çoxsaylı mülki itkilərə və aclıq da daxil olmaqla getdikcə pisləşən humanitar vəziyyətə yol açdığını bildirib.

“Bu vəziyyət tamamilə qəbuledilməzdir,” – deyə İvaya qeyd edib və Tel-Əviv hökumətini Qəzzadakı humanitar böhranı dərhal aradan qaldırmaq üçün konkret addımlar atmağa çağırıb.

Tokio hökumətinin bölgədə iki dövlətli həllə sarsılmaz dəstək verdiyini vurğulayan İvaya, “İsrail bölgədə sülh prosesinin yenidən başlanmasına mane olacaq bütün birtərəfli addımları dərhal dayandırmalıdır,” – deyə bildirib.

İvaya, İsraili “hərbi təzyiq olmadan, diplomatik danışıqlar yolu ilə daimi atəşkəsin əldə olunması üçün yeni səylər göstərməyə” çağırıb.