BAKI, AzerVoice, Nərmin Ağayeva

Əfqanıstanın Nanqarhar əyalətinin mərkəzi rayonu olan Cəlalabad yaxınlığında 6,0 bal gücündə zəlzələ baş verib.

AzerVoice xəbər verir ki, İlkin məlumatlara görə, zəlzələ nəticəsində 250-dən çox insan həyatını itirib, 500-dən çox insan yaralanıb, ölü sayının artacağı gözlənilir.

ABŞ Geoloji Xidməti (USGS) zəlzələnin episentrinin Cəlalabaddan 27 kilometr şimal-şərqdə, Pakistan sərhədi yaxınlığında, 8 kilometr dərinlikdə olduğunu açıqlayıb. Zəlzələnin vurduğu ən böyük zərər Kunar əyalətində qeydə alınıb, burada torpaq sürüşməsi nəticəsində yollar bağlanıb və xilasetmə işləri vertolyotlarla aparılır.

Əfqanıstan İnformasiya Nazirliyinin rəsmisi verdiyi açıqlamada, zəlzələnin ən çox Kunar əyalətini vurduğunu, axtarış-xilasetmə işlərinin çətin şərtlər altında davam etdiyini bildirib. Rəsmi, ilkin hesablamalara görə 250-dən çox insanın öldüyünü, 500-dən çox insanın yaralandığını və ölü sayının artma ehtimalının olduğunu qeyd edib.

Əfqanıstanın müvəqqəti hökumətinin sözçüsü Zabihullah Mücahid X platformasında yayımladığı bəyanatda zəlzələnin şərq əyalətlərində can və mal itkisinə səbəb olduğunu təsdiqləyib. Mücahid, yerli rəsmilərin və sakinlərin xilasetmə işlərinə cəlb olunduğunu, mərkəzi hökumət və ətraf əyalətlərdən qrupların bölgəyə göndərildiyini vurğulayıb.
O, “Həyatları xilas etmək üçün bütün mövcud resurslardan istifadə ediləcək,” – deyə əlavə edib.

Yerli rəsmilər zəlzələnin Əfqanıstanda son illərdə baş verən ən güclü təbii fəlakətlərdən biri olduğunu bildirib. Bundan əlavə, bölgədə 5,2 bal gücündə iki afterşok da qeydə alınıb, bu da xilasetmə işlərini daha da çətinləşdirir.