BAKI, AzerVoice, Səməd Əyyubov

Kanada hökuməti Kiyevə silah tədarükü üçün 2 milyard Kanada dolları (təxminən 1,45 milyard ABŞ dolları) ayıracaq.

AzerVoice xəbər verir ki, bu barədə baş nazir Mark Karninin mətbuat xidməti məlumat yayıb.

Söhbət bu ilin iyununda keçirilən “Yeddilər qrupu” (G7) sammitinin yekunları üzrə açıqlanmış yardım paketindən gedir. Hökumətin planına görə, 835 milyon Kanada dolları (təxminən 603,6 milyon ABŞ dolları) zirehli texnika, tibbi avadanlıq, ehtiyat hissələri, atıcı silahlar, sursat, partlayıcı maddələr və pilotsuz uçuş aparatlarının (PUA) alınmasına yönəldiləcək. Daha 680 milyon Kanada dolları (491,5 milyon ABŞ dolları) isə NATO tərəfindən hazırlanmış Ukraynanın prioritet ehtiyacları siyahısına uyğun olaraq ABŞ istehsalı silahların alınmasına ayrılacaq.

Bundan başqa, 220 milyon Kanada dolları (təxminən 159 milyon ABŞ dolları) Ukrayna və Kanada sənayesi arasında PUA və elektron mübarizə vasitələrinin istehsalı və alınması üçün yaradılacaq birgə müəssisələrə sərmayə qoyulacaq. 165 milyon Kanada dolları (təxminən 119,3 milyon ABŞ dolları) Ukrayna üzrə Əlaqə Qrupunun işinə, 100 milyon Kanada dolları (təxminən 72,3 milyon ABŞ dolları) isə sursatlarla bağlı “çex təşəbbüsü” çərçivəsində silah alınmasına ayrılacaq.

Daha əvvəl, Norveç höküməti bildirmişdi ki Ukrayna üçün hava hücumundan müdafiə sistemlərinin alınmasına təxminən 7 milyard kron (695 milyon dollardan çox) ayıracaq.