BAKI, AzerVoice, Nərmin Ağayeva

Polşada Rusiyaya məxsus pilotsuz təyyarənin qəzaya uğrayaraq partlaması NATO-nu hərəkətə keçirib.

AzerVoice xəbər verir ki, Polşanın şərqindəki Lukov qraflığının Osiny şəhərində qarğıdalı tarlasına düşərək partlayan obyektin Rusiyaya aid pilotsuz uçuş aparatı olduğu müəyyənləşdirilib.

Polşanın PAP agentliyinin məlumatına görə, partlayış Ukrayna sərhədindən təxminən 100 kilometr aralıda baş verib. Hadisə nəticəsində ölən və yaralanan olmayıb, ancaq bəzi evlərin şüşələri sınıb. Hadisə yerində metal və plastik qalıqları aşkarlanıb.

Polşanın müdafiə naziri Vladislav Kosinyak-Kamış açıqlamasında, “Rusiyanın təxribatı ilə qarşı-qarşıyayıq”- deyə bildirib və oxşar halların Moldova, Rumıniya, Litva, Latviya və Bolqarıstanda da baş verdiyini xatırladıb. Nazir əlavə edib ki, bütün hərbi bölmələr yüksək hazırlıq vəziyyətinə gətirilib və diplomatik addımlar atılacaq.

Polşanın xarici işlər naziri Radoslav Sikorski isə “Hava məkanımızın şərqdən pozulması, NATO daxilində ən mühüm missiyamızın ərazimizin müdafiəsi olduğunu göstərir” - deyə vurğulayıb.

Qeyd edək ki, Polşa Silahlı Qüvvələrinin Əməliyyat Komandanlığı hava məkanının Ukrayna və Belarus tərəfindən pozulmadığını, lakin təhlükəsizlik məqsədilə nəzarətin gücləndirildiyini açıqlayıb.