BAKI, AzerVoice

NATO-nun Baş katibi Mark Rutte Ukrayna üzrə əlaqə qrupunun iclasında çıxış edərək, alyansa üzv ölkələrin müdafiə nazirlərini Ukrayna üçün ABŞ-dan daha çox silah almağa çağırıb.

AzerVoice xəbər verir ki, bu barədə NATO-nun mətbuat xidməti məlumat yayıb.

Qeyd olunub ki, Rutte çıxışında ötən həftə ABŞ prezidenti Donald Trampla birlikdə elan etdiyi təşəbbüsə diqqət çəkib. Bu təşəbbüs, Kanadada və Avropada müttəfiq ölkələrin investisiyaları vasitəsilə Ukraynaya ABŞ-ın hərbi imkanlarının yeni mərhələdə təqdim edilməsini nəzərdə tutur.

Rutte əlavə edib ki, Ukrayna üçün ABŞ-dan daha çox silah alınması, NATO-nun 24–25 iyun tarixləri arasında Haaqada keçirilən sammitində müəyyən olunmuş üç əsas vəzifənin yerinə yetirilməsinə imkan verəcək: hərbi xərclərin artırılması, hərbi istehsalın genişləndirilməsi və Ukraynaya dəstəyin davam etdirilməsi.

Qeyd edək ki, ötən həftə Rutte ilə Vaşinqtonda keçirilən görüşdə Donald Tramp bəyan etmişdi ki, ABŞ bundan sonra Ukraynaya silahları pulsuz verməyəcək, yalnız satış edəcək və bu silahların ödənişini Avropa ölkələri və Kanada həyata keçirməlidir.