BAKI, AzerVoice

Pentaqon Los-Ancelesdəki etirazlarla bağlı 2000 Milli Qvardiyaçını geri çağırır.

AzerVoice xəbər verir ki, ABŞ Müdafiə Nazirliyi (Pentaqon) Los-Ancelesdə qeyru-qanuni miqrantlara dəstək aksiyaları fonunda iğtişaşların qarşısını almaq üçün yerləşdirilmiş Milli Qvardiya üzvlərinin bir hissəsini geri çağırıb.

Pentaqonun sözçüsü Şon Parnell bildirib ki, prezident Donald Trampın göstərişi ilə Los-Ancelesə göndərilmiş təxminən 4000 hərbçidən 2000-i artıq vəzifələrinə geri çəkiləcək. O, bu qərarın “missiyanın uğurla başa çatması” ilə əlaqədar qəbul edildiyini vurğulayıb.

ABŞ Müdafiə naziri Pit Heqseth, İmmiqrasiya və Gömrük Mühafizəsi (ICE) əməkdaşlarının təhlükəsizliyinin təmin edilməsi məqsədilə bölgəyə həm Milli Qvardiya, həm də 700-ə yaxın dəniz piyadasının göndərildiyini açıqlayıb.

Xatırladaq ki, Los-Ancelesdə ICE tərəfindən saxlanılan qeyri-qanuni miqrantlara dəstək nümayişləri zamanı toqquşmalar baş verib və çoxlu sayda etirazçı saxlanılıb. Prezident Tramp şəhərdə təhlükəsizliyi təmin etmək üçün Milli Qvardiyanı səfərbər etdiyini bildirərək, vəziyyətin gərginləşməsində Demokrat Partiyasından olan yerli rəhbərləri ittiham edib.

Qeyd edək ki, Kaliforniya ştatının qubernatoru Qavin Nyusom Trampın bu qərarını tənqid edərək, federal hökumətin ştatın yurisdiksiyasına müdaxilə etdiyini bildirib.