BAKI, AzerVoice

ABŞ Müdafiə naziri Pit Heqset cümə axşamı günü xüsusi mətbuat konfransı keçirərək, İranın nüvə obyektlərinə endirilən son hücumlarla bağlı yeni qiymətləndirmə təqdim edəcək.

AzerVoice xəbər verir ki, bu qərar, Vaşinqtonda zərbələrin effektivliyi ilə bağlı yaranmış fikir ayrılıqları fonunda verilib.

Qeyd edək ki, ABŞ-ın 22 iyun tarixində İranda yerləşən Fordo, İsfahan və Natanz nüvə obyektlərinə təşkil etdiyi hücumun nəticələri barədə ziddiyyətli məlumatlar yayılıb. CNN-in ilk olaraq yayımladığı məxfi qiymətləndirməyə əsasən, əsas texniki komponentlər məhv edilməyib və İranın nüvə proqramı yalnız bir neçə ay geri atılıb.

Ağ Evin sözçüsü Karolin Leavitt isə bu iddiaları təkzib edərək bildirib ki, "zərbələr nəticəsində obyektlər yüzlərlə metr dağıntı altında qalıb" və ABŞ-ın zərbədən öncə uranın daşınmasına dair heç bir məlumatı olmayıb.

Prezident Donald Tramp isə zərbələrin İranın nüvə infrastrukturunu "tamamilə məhv etdiyini" bəyan edib və Müdafiə naziri Heqseti "Amerikalı pilotların şərəfini müdafiə etmək" üçün mətbuat qarşısına çıxardığını bildirib.

Digər tərəfdən, İsrail Baş naziri Benyamin Netanyahu hücumların İranın nüvə layihəsini “uğurla dayandırdığını” bildirib və bu səylərin davam etdiriləcəyini vurğulayıb. İran Xarici İşlər Nazirliyi isə obyektlərin ciddi zədələndiyini təsdiqləyib.

ABŞ tərəfi, yaranmış hərbi eskalasiyaya baxmayaraq, gələn həftə İranla nüvə danışıqlarını bərpa etməyi planlaşdırır. Prezident Tramp, danışıqların keçirilməsinin mümkünlüyünü dilə gətirərək, "Bəlkə də razılaşma imzalayacağıq, bəlkə də yox", deyə qeyd edib.

Qeyd edək ki, 12 günlük qarşıdurma nəticəsində İran tərəfi 627 mülki şəxsin həlak olduğunu açıqlayıb. İsrail isə 28 itki verdiyini bildirib. Tehranda şənbə günü həlak olmuş yüksək rütbəli komandirlər və nüvə alimləri üçün rəsmi dəfn mərasimi keçiriləcək.