BAKI, AzerVoice

İran rejimi ölkəni geri salır – niyə rejim dəyişikliyi olmasın?

AzerVoice xəbər verir ki, ABŞ prezidenti Donald Tramp Truth Social hesabında İranla bağlı növbəti sərt açıqlamalarla çıxış edib.

Tramp İran rəhbərliyinin ölkənin inkişafına mane olduğunu bildirib və “rejim dəyişikliyi” ideyasını açıq şəkildə gündəmə gətirib.

“Rejim dəyişikliyi ifadəsi siyasi cəhətdən düzgün qəbul edilmir, lakin hazırkı İran rejimi ölkəni inkişaf etdirmirsə, niyə dəyişikliyə getməyək?” - deyə Tramp yazıb. O, paylaşımında “Gəlin İranı yenidən möhtəşəm edək !!” şüarından istifadə edib.

Tramp daha sonra ABŞ-ın İranın nüvə obyektlərinə endirdiyi hava zərbələrinə toxunaraq, hücumların “sərt və dəqiq” olduğunu bildirib. Onun sözlərinə görə, bu zərbələr nəticəsində İranın əsas nüvə obyektlərinə böyük ziyan dəyib.

Bundan əlavə, Tramp ABŞ ordusunu və əməliyyatda iştirak edən B-2 bombardmançılarını yüksək qiymətləndirərək, onların Missuri ştatına təhlükəsiz eniş etdiyini qeyd edib və “Yaxşı iş gördüyünüz üçün təşəkkür edirəm” sözləri ilə hərbçilərə təşəkkür edib.

Qeyd edək ki, İran tərəfi ABŞ-ın hücumlarını beynəlxalq hüquqa zidd addım kimi qiymətləndirib və rəsmi Tehranın BMT Təhlükəsizlik Şurasında Vaşinqtonun qınanması üçün çağırış etdiyi bildirilir. İran hücumların “ABŞ tarixində qara ləkə” olduğunu bəyan edib.