BAKI, AzerVoice

ABŞ prezidenti Donald Tramp, İsrail və İran arasında davam edən münaqişəyə baxmayaraq, Haaqada keçiriləcək NATO sammitində iştirak edəcək.

AzerVoice xəbər verir ki, bu barədə Ağ Evin mətbuat katibi Kerolayn Livitt jurnalistlər üçün keçirilən brifinqdə məlumat verib.

“Bazar ertəsi səhər Vaşinqtondan yola düşəcəyik”, – bu sözlərlə o, Trampın NATO-nun Haaqa sammitinə gedib-getməyəcəyi ilə bağlı sualı cavablandırıb.

Qeyd edək ki, NATO-nun yüksək səviyyəli iclası 24–25 iyun tarixləri arasında Haaqada keçiriləcək. Sammitdə 45 dövlət və hökumət başçısı, 45 xarici işlər və müdafiə naziri, eləcə də təxminən 6 min nəfərlik nümayəndə heyətinin iştirakı gözlənilir.

Əlavə edək ki, ABŞ hökuməti daha əvvəl Trampın sammitdə iştirak edəcəyini açıqlasa da, ABŞ Dövlət Departamentinin sözçüsü Temmi Bryus bu həftənin əvvəlində Trampın Yaxın Şərqdəki böhranla bağlı iş qrafiki səbəbilə toplantıya qatıla bilməyəcəyi ehtimalını istisna etməmişdi. Lakin Tramp çərşənbə günü jurnalistlərə verdiyi açıqlamada Haaqaya səfər etməyi planlaşdırdığını bir daha təsdiqləyib.