BAKI, AzerVoice

MHP sədri Devlet Bahçeli qalmaqallı karikaturaya sərt reaksiya verib.

AzerVoice xəbər verir ki, Milliyyətçi Hərəkat Partiyasının (MHP) lideri Devlet Bahçeli partiyasının qrup toplantısında çıxış edərək, son günlərdə yayılan və İslam dininə qarşı hörmətsizlik kimi dəyərləndirilən karikaturaya münasibət bildirib.

Bahçeli qeyd edib ki, Məhəmməd Peyğəmbərə edilən hücum və təhqirləri qəti şəkildə qınayır, İslamofobiyaya qarşı hüquqi tədbirlər görmək məqsədilə xüsusi fəaliyyət planının hazırlanmasının vacibliyini vurğulayır:

"Yumor adlı jurnalda yayılan iyrənc hücumu nifrətlə pisləyirəm və İslamofobiya təhlükəsinə qarşı mübarizənin gücləndirilməsi üçün hüquqi addımların atılmasını tələb edirəm."

O, həmçinin mövcud vəziyyətin Türkiyə və dünya ictimaiyyətində böyük narahatlıq yaratdığını, belə hallara qarşı həm siyasi, həm də hüquqi baxımdan sistemli və təsirli tədbirlərin zəruri olduğunu bildirib.

Bahçeli çıxışında həmçinin şəxsi vəziyyətindən də danışaraq, “Yaşadığım xəstəliyə görə könülsüz ayrılığa məcbur oldum, amma işimizi dayandırmadıq, gündəmi yaxından izlədik, fikirlərimizi millətimizlə paylaşdıq. Dövrümüzdə süni intellektə bağlı yalan iddialar və yersiz tənqidlərə şahid olduq. Hər şeyin yeganə əmanətçisi Uca Allahdır.” - deyə qeyd edib.

Qeyd edək ki, Türkiyədə məşhur “Leman” adlı satirik jurnalın 26 iyun tarixli buraxılışında Hz. Məhəmməd peyğəmbərin təhqiramiz təsvirinə yer verilməsi böyük ictimai qınağa səbəb olub. Jurnal barəsində "dini dəyərləri açıq-aşkar aşağılama" ittihamı ilə İstanbul Cümhuriyyət Baş Prokurorluğu tərəfindən cinayət işi açılıb və məsələ ilə bağlı 4 nəfər barəsində həbs qərarı verilib.