BAKI,VOA Orxan Qədirzadə

Birləşmiş Ərəb Əmirlikləri (BƏƏ) Hörmüz boğazında ölkəyə məxsus "Mombasa" və "Al Bahiyah" neft tankerlərinə İran tərəfindən qanadlı raketlərlə həyata keçirilən hücumu ən sərt şəkildə pisləyib.

BƏƏ Xarici İşlər Nazirliyinin yaydığı bəyanatda bildirilir ki, hücum tankerlər Hörmüz boğazının cənub dəniz marşrutu ilə Oman ərazi sularından keçərkən baş verib və İran tərəfindən buraxılan iki qanadlı raketlə həyata keçirilib.

Nazirlik hücum nəticəsində Hindistan vətəndaşı olan bir nəfərin həlak olduğunu, səkkiz nəfərin isə yaralandığını açıqlayıb.

Yaralılardan dördünün vəziyyətinin ağır olduğu bildirilib.

Zərərçəkənlər arasında altı Hindistan və iki Ukrayna vətəndaşı var.

BƏƏ Xarici İşlər Nazirliyi həlak olan şəxsin ailəsinə, həmçinin Hindistan hökumətinə və xalqına dərin hüznlə başsağlığı verib, yaralananların tezliklə sağalmasını arzulayıb.

Bəyanatda vurğulanıb ki, İranın bu hücumu Birləşmiş Millətlər Təşkilatı Təhlükəsizlik Şurasının dəniz naviqasiyasının azadlığının qorunmasının vacibliyini təsdiqləyən və ticarət gəmilərinin hədəfə alınmasını, eləcə də beynəlxalq dəniz marşrutlarının bağlanmasını rədd edən 2817 saylı qətnaməsinin kobud şəkildə pozulmasıdır.

Nazirlik qeyd edib ki, ticarət gəmilərinin hədəfə alınması və Hörmüz boğazından iqtisadi təzyiq və ya şantaj vasitəsi kimi istifadə olunması piratçılıq aktıdır və regionun sabitliyi, xalqların təhlükəsizliyi, eləcə də qlobal enerji təhlükəsizliyi üçün birbaşa təhdid yaradır.

BƏƏ İranı heç bir səbəb olmadan həyata keçirilən bu hücumları dərhal dayandırmağa, bütün hərbi əməliyyatlara tam şəkildə son qoymağa və regional təhlükəsizliyin, eləcə də qlobal iqtisadiyyat və beynəlxalq ticarətin sabitliyinin qorunması məqsədilə Hörmüz boğazını tam və qeyd-şərtsiz yenidən açmağa çağırıb.