BAKI, VOA, Nailə Babazadə
Livanın Təhsil və Ali Təhsil Nazirliyi ölkədəki mövcud hərbi vəziyyətlə əlaqədar rəsmi bəyanat yayıb.
VOA xəbər verir ki, açıqlamada bildirilir ki, can təhlükəsizliyi və fövqəladə təhlükəsizlik vəziyyəti nəzərə alınaraq, ölkə daxilindəki bütün özəl və dövlət məktəblərində, həmçinin peşə və texniki təhsil müəssisələrində təhsil müvəqqəti olaraq dayandırılıb. Nazirlik hadisələrin gedişatını anbaan izlədiyini və qərarların gündəlik təhlükəsizlik qiymətləndirmələrinə uyğun olaraq yenilənəcəyini vurğulayıb.
Nazirliyin bəyanatında İsrailin hücumları nəticəsində evlərini tərk etmək məcburiyyətində qalan Livan xalqı ilə həmrəylik ifadə olunub. Bildirilib ki, hücumlardan qaçan və yerindən edilmiş çox sayda vətəndaş hazırda təhsilin dayandırıldığı məktəb binalarında sığınacaq tapıb. Milli Təhsil Nazirliyi bu şəxslərə dəstək olacağını və məktəb binalarının humanitar məqsədlər üçün istifadə ediləcəyini qeyd edib.
Gərginliyin artmasına səbəb İsrail ordusunun Livanın cənubuna, Bekaa vadisinə və paytaxt Beyruta endirdiyi ağır hava zərbələridir. İsrail ordusu "Hizbullah"ı hədəf aldığını iddia edərək 50-dən çox kənd və qəsəbə sakininə evlərini tərk etmələri barədə xəbərdarlıq edib. Beyrutda güclü partlayış səsləri eşidilir, ölkənin şimalında isə raket atəşləri səbəbindən həyəcan siqnalları işə düşüb. Hazırda Livanda hərbi vəziyyət fonunda humanitar böhranın dərinləşməsi müşahidə olunur.