BAKI,VOA,Yusif Şərifzadə

İsrail ordusunun Livanın cənubunda yerləşən kəndlərdən birinə artilleriya zərbəsi endirdiyi bildirilib. Hadisə Livan-İsrail arasında gərginliyin davam etdiyi bir vaxtda baş verib.

VOA xəbər verir ki, Livanın Milli Xəbər Agentliyinin məlumatına görə, İsrail mərmisi Nəbatiyyə bölgəsində yerləşən Kfar Şuba kəndinə düşüb.

Daha əvvəl eyni bölgədə yerləşən Nəbatiyyə əl-Fauqa və Kfar Təbnit ərazilərində də fasilələrlə artilleriya atəşinin qeydə alındığı bildirilib.

İsrailin Livana qarşı hücumlarını davam etdirdiyi qeyd olunur. Bu addımlar iki ölkə arasında əldə edilmiş “atəşkəs” razılaşmasına baxmayaraq həyata keçirilir.

Hadisə Livan və İsrail nümayəndələri arasında İtaliyanın paytaxtı Roma şəhərində keçirilməsi planlaşdırılan danışıqlar ərəfəsində baş verib.

Livan Səhiyyə Nazirliyinin məlumatına görə, İsrailin martın 2-də başlatdığı hərbi əməliyyatlar nəticəsində 4 min 300-dən çox insan həlak olub, 12 min 200-dən çox nəfər yaralanıb.

Beynəlxalq ictimaiyyət Livanın cənubunda gərginliyin azaldılması və atəşkəs rejiminin qorunması üçün çağırışlar edir.