BAKI,VOA, Fərid Mikayılov
İsrail ordusu çərşənbə günü atəşkəs razılaşmasından sonra ilk dəfə Livanın paytaxtı Beyrutu hədəf alıb.
VOA xəbər verir ki, hücum, ötən ay əldə olunan atəşkəsdən sonra bölgədə gərginliyin yenidən artdığı bir dövrə təsadüf edir.
İsrail tərəfi zərbənin, Hizbullahın elit “Radvan” bölməsinin komandirlərindən birini hədəf aldığını açıqlayıb. Hücum Beyrutun cənub ətrafında həyata keçirilib. İsrailin Baş naziri Benyamin Netanyahu və müdafiə naziri İsrael Katz birgə bəyanatda əməliyyatı təsdiqləyib. İsrail mediası hədəf alınan şəxsin öldürüldüyünü yazsa da, bu məlumat rəsmi şəkildə təsdiqlənməyib.
Atəşkəs razılaşması ABŞ–İran xəttində daha geniş diplomatik balansın tərkib hissəsi kimi qiymətləndirilirdi və Livanda İsrail hücumlarının dayanması Tehranın əsas tələblərindən biri idi. Lakin son hadisə bu prosesin davamlılığı ilə bağlı suallar yaradıb.
Eyni zamanda İsrail ordusu Livanın cənubunda Litani çayının şimalında yerləşən bir neçə kəndin boşaldılması ilə bağlı çağırış edib. Bu addım əməliyyat zonasının genişləndiyi ehtimalını gücləndirib.
Livan tərəfi də vəziyyətin gərginləşdiyini bildirir. Livan Səhiyyə Nazirliyinin məlumatına görə, ölkənin cənubundakı Zelaya bölgəsinə endirilən zərbədə 4 nəfər, o cümlədən qadınlar və yaşlı bir kişi həlak olub.
Hizbullah isə İsrail ordusuna qarşı pilotsuz uçuş aparatları və raket hücumları həyata keçirdiyini açıqlayıb. İsrail tərəfi isə Livan ərazisindən atılan dronların qarşısının alındığını və bir neçə hərbi hədəfin vurulduğunu bildirib.
Rəsmi Beyrut isə hələlik yüksək səviyyəli danışıqların vaxtının yetişmədiyini bildirir. Baş nazir Nəvaf Salam vurğulayıb ki, istənilən gələcək danışıqlar atəşkəsin möhkəmləndirilməsi və İsrailin geri çəkilməsi şərti ilə mümkündür.
ABŞ prezidenti Donald Tramp tərəflər arasında sülh üçün “böyük imkan” olduğunu desə də, bölgədə davam edən qarşılıqlı hücumlar atəşkəsin gələcəyini qeyri-müəyyən edir.
Son məlumatlara görə, müharibənin başlanmasından bu yana Livanda 2700-dən çox insan həyatını itirib. İsrail isə həm əsgər, həm də mülki itkilər barədə məlumat yayıb.