BAKI, AzerVoice

Birləşmiş Millətlər Təşkilatının (BMT) Humanitar İşlər üzrə Baş katib müavini və Təcili Yardım Koordinatoru Tom Fletcher Qəzza zolağındakı humanitar vəziyyətlə bağlı ciddi xəbərdarlıq edib.

AzerVoice xəbər verir ki, Fletcherin yazılı açıqlamasında qeyd olunub ki, Qəzzada hər 3 nəfərdən biri günlərdir yemək yeməyib. O, beynəlxalq ictimaiyyəti humanitar yardımların dərhal və maneəsiz çatdırılması və davamlı atəşkəsin təmin edilməsi üçün təcili tədbirlər görməyə çağırıb.

"Yardımlar nə gecikdirilməli, nə də hücumlara məruz qalmalıdır. Yardım almağa çalışan insanlar vurulur, uşaqlar isə gözümüzün önündə aclıqdan əriməyə başlayır", – deyə Fletcher vurğulayıb.

İsrailin hücumları və blokadası altındakı Qəzzada fəlakət səviyyəsində aclıq və səhiyyə böhranı yaşanır. Fletcher qeyd edib ki, yardım karvanlarının sərhədlərdən sürətli keçidi təmin edilməli və yardım gözləyən insanlara hücumlar dərhal dayandırılmalıdır.

BMT rəsmisi, İsrailin Qəzzaya humanitar yardım girişinə dair bəzi addımlar atacağını bəyan etməsinə münasibət bildirərək əlavə edib ki, bölgədəki aclıq və böhranı aradan qaldırmaq üçün böyük həcmdə yardıma ehtiyac var.

Qeyd edək ki, İsrailin oktyabrın 7-dən bu yana Qəzzaya davam edən hücumları nəticəsində ən azı 59.821 fələstinli həyatını itirib, 144.851 nəfər isə yaralanıb.

Bölgədə su, dərman, tibbi ləvazimat və gigiyena vasitələrinin ciddi çatışmazlığı hökm sürür. Xüsusilə uşaqlar arasında aclıq və xəstəlik səbəbilə ölüm halları artmaqdadır.

Yerindən edilən fələstinlilərin sayı artıq 2 milyona yaxınlaşır, insanlar dərmə-deşik çadırlarda, həddən artıq sıx məkanlarda gigiyenik şəraitdən məhrum halda yaşayır.

İsrail ordusu isə gündəlik bombardmanlarla bu insanların sığındığı mülki əraziləri və çadır düşərgələrini hədəf almağa davam edir.