BAKI,AzerVoice

İran Aviasiya Təşkilatı ölkənin hava sahəsinin ikinci bir rəsmi açıqlamaya qədər bütün uçuşlara bağlandığını elan edib.

AzerVoice xəbər verir ki, sərnişinlərin təhlükəsizliyini təmin etmək məqsədilə NOTAM (aviadaşıyıcılar üçün bildiriş) vasitəsilə bütün uçuşların dayandırıldığı bildirilib. Hakimiyyət orqanları vətəndaşlara hava limanlarına getməkdən çəkinməyi və yeni məlumatları izləməyi tövsiyə edib.

İran hakimiyyəti sonuncu dəfə hava sahəsinin 14 iyun saat 14:00-a qədər bağlı qalacağını açıqlayıb. Bu qərarın müddətsiz uzadılması bölgədəki gərgin hərbi vəziyyətlə əlaqələndirilir.

Qeyd edək ki, 13 iyun tarixində İsrail tərəfindən İranın müxtəlif şəhərlərinə, xüsusilə də nüvə obyektlərinə və ordunun yüksək komandanlığına qarşı həyata keçirilən hava hücumları regionda böhranı daha da dərinləşdirib.

Hücum nəticəsində İran Silahlı Qüvvələrinin Baş Qərargah rəisi, İnqilab Keşikçiləri Korpusunun komandanı və digər yüksək rütbəli zabitlər həlak olub. 9 nüvə aliminin öldüyü və sivillər arasında 78 nəfərin həyatını itirdiyi bildirilib.

Buna cavab olaraq İran ordusu ballistik raketlərlə İsrailə hücum edib. Raket zərbələri nəticəsində 3 nəfər ölüb, 172 nəfər yaralanıb.