BAKI,VOA,Yusif Şərifzadə

Küveyt Xarici İşlər Nazirliyi Hörmüz boğazında Əbu-Dabinin Milli Neft Şirkətinə məxsus iki gəmiyə qarşı həyata keçirildiyi bildirilən hücumu pisləyib. Nazirlik hadisənin dəniz nəqliyyatının təhlükəsizliyinə, enerji təchizatının sabitliyinə və beynəlxalq ticarətə təhlükə yaratdığını bildirib.

VOA xəbər verir ki, Küveyt Xarici İşlər Nazirliyi hadisəni “qəbuledilməz İran hücumu” kimi qiymətləndirib. Nazirlik bölgədə gərginliyin daha da artmasına səbəb ola biləcək bütün addımların dayandırılmasının vacibliyini vurğulayıb.

Küveyt Xarici İşlər Nazirliyi beynəlxalq sularda sərbəst gəmiçilik və təhlükəsiz keçid hüququna hörmət edilməsinə çağırıb.

Nazirlik həmçinin Hörmüz boğazının tam və qeyd-şərtsiz şəkildə yenidən açılmasının vacibliyini vurğulayıb.

Küveytin açıqlamasında Hörmüz boğazında təhlükəsiz gəmiçilik məsələsinin yalnız bölgə ölkələri üçün deyil, beynəlxalq enerji təchizatı və ticarət üçün də mühüm əhəmiyyət daşıdığı bildirilib.

Hörmüz boğazında gərginliyin artması enerji daşıyıcılarının beynəlxalq bazarlara çatdırılması ilə bağlı narahatlıqları da gücləndirib.

Küveyt bölgədə qarşıdurmanın genişlənməsinin qarşısını almaq üçün tərəfləri təmkinli davranmağa və beynəlxalq sularda gəmiçilik azadlığına riayət etməyə çağırıb.