BAKI,VOA, Fərid Mikayılov

İran ordusu Qətərin ABŞ hərbi bazasına endirilən zərbə zamanı itkin düşən üç iranlı pilotun taleyi barədə hələ də məlumat təqdim etmədiyini açıqlayıb.

VOA xəbər verir ki, İran Ordusunun sözçüsü, briqada generalı Məhəmməd Əkrəminiyanın sözlərinə görə, ABŞ-nin Qətərdə yerləşən "Əl-Udeyd" hərbi bazasına qarşı əməliyyatdan sonra itkin düşən Hərbi Hava Qüvvələrinin üç pilotunun axtarışı davam edir. O bildirib ki, Qətər tərəfi indiyədək onların taleyi ilə bağlı heç bir məlumata malik olmadığını iddia edir.

Əkrəminiya Qətər hökumətini və ordusunu beynəlxalq humanitar hüquq çərçivəsində daha məsuliyyətli davranmağa çağıraraq, itkin pilotların taleyinin aydınlaşdırılması üçün daha fəal əməkdaşlıq etməyə səsləyib.

O qeyd edib ki, araşdırmalar davam etsə də, üç pilotun taleyi hələ də naməlum olaraq qalır.

İran ordusu daha əvvəl ABŞ-nin istifadə etdiyi "Əl-Udeyd" aviabazasına martın 2-də təşkil edilən hücumda iştirak edən Su-24 bombardmançısının pilotu briqada generalı Məcid Kazeminin həlak olduğunu DNT analizinin təsdiqlədiyini açıqlayıb.

Məlumata görə, pilotun cənazəsi bir neçə ay sonra İrana qaytarılıb. Digər iki Su-24 bombardmançısının ekipajında olan üç pilotun taleyinin müəyyənləşdirilməsi istiqamətində araşdırmalar davam edir.