BAKI,VOA,Yusif Şərifzadə

İran Xarici İşlər Nazirliyi Hörmüz boğazı ilə bağlı Oman rəsmiləri ilə aparılan danışıqların davam etdiyini açıqlayıb. Tehran beynəlxalq gəmiçiliyin pozulmasına görə məsuliyyəti ABŞ və İsrailin hərbi fəaliyyətinin üzərinə qoyub.

VOA xəbər verir ki, İran Xarici İşlər Nazirliyinin sözçüsü İsmayıl Bəqai bildirib ki, ötən həftə Tehranda başlayan danışıqlar bir neçə mərhələdə davam edir və cümə axşamı da növbəti görüş keçirilib.

Bəqayinin sözlərinə görə, hazırda Hörmüz boğazının bağlı olmasının səbəbi ABŞ-nin bölgədəki fəaliyyəti və bu su yolunda yaratdığı təhlükəsizlik problemidir.

"Hazırda Hörmüz boğazı ABŞ-nin fəaliyyəti və bu su yolunda yaratdığı qeyri-sabitlik səbəbindən bağlıdır. Beynəlxalq gəmiçilik yalnız ABŞ-nin hərəkətləri nəticəsində zərər görür", – deyə o, ILNA agentliyinə bildirib.

İran rəsmisi vəziyyətin ABŞ və İsrailin martın 28-dən etibarən başladığını iddia etdiyi hərbi əməliyyatların nəticəsi olduğunu bildirib. O, İran gəmilərinə hücumlar, limanlar və tranzit marşrutlarının "qanunsuz blokadası", eləcə də İrana qarşı davam edən zərbələrin regional vəziyyəti daha da gərginləşdirdiyini iddia edib.

ABŞ və İsrail İranın səsləndirdiyi bu ittihamlara hələlik rəsmi münasibət bildirməyiblər. İranın iddiaları müstəqil mənbələr tərəfindən təsdiqlənməyib.