BAKI,VOA,Yusif Şərifzadə

İran xarici işlər nazirinin müavini Kazım Qəribabadi bildirib ki, Tehran Hörmüz boğazı üzərində suverenliyini qorumaq üçün bütün mümkün variantları nəzərdən keçirə bilər. Onun sözlərinə görə, bu variantlar arasında hərbi əməliyyatların yenidən başlaması da istisna edilmir.

VOA xəbər verir ki, Fars agentliyinin yaydığı məlumata əsasən, Kazem Qəribabadi Hörmüz boğazında Oman sahillərinə daha yaxın cənub gəmiçilik zolağının açılmasının İranın bölgə üzərində suverenliyini həyata keçirməsini mümkünsüz edəcəyini iddia edib.

İran rəsmisi bildirib ki, belə bir addım Tehranın təhlükəsizlik və nəzarət imkanlarını məhdudlaşdıracaq. O, bu səbəbdən İranın öz mövqeyini qorumaq üçün müxtəlif tədbirlər görməyə hazır olduğunu vurğulayıb.

Kazım Qəribabadi, həmçinin, "Hörmüz boğazına yaxınlaşmaq istəyən istənilən Avropa gəmisi bizim üçün legitim hədəfdir", - deyə bildirib.

Bu açıqlama İranın rəsmi mövqeyini əks etdirir. Avropa ölkələri və ya digər beynəlxalq tərəflər Qəribabadinin bəyanatına hələlik rəsmi münasibət bildirməyiblər. Hörmüz boğazı qlobal enerji tədarükü baxımından dünyanın ən mühüm dəniz nəqliyyatı marşrutlarından biri hesab olunur.